Асали Дарвоз давоӣ ва гуворост

Дарвоз 04.05.2016 /АМИТ «Ховар»/. Мутобиқи Қарори Ҳукумати Ҷумҳурии Тоҷикистон «Дар бораи рушди соҳаи занбӯрпарварӣ барои солҳои 2011-2016»  занбӯрпарварони ноҳияи Дарвоз фаъолияташонро боз ҳам густариш дода, шумораи хоҷагиҳои занбӯри асалро то ба 180 адад расониданд. Ҳар яке аз ин хоҷагиҳо аз 50 то 100 қуттӣ занбӯр доранд. Сарвари яке аз ин хоҷагиҳо Ғозиҷони Шодик  гуфт, ки чаҳор сол пеш  мо ҳамагӣ 5 тонна асал мегирифтем, аммо баъди ба тасвиб расидани қарори мазкур кумаку дастгириҳои Ҳукумати ҷумҳурию  маҳаллӣ бештар шуд ва соли гузашта ҳосилнокиро ба 60 тонна расонидем. Дар шароити Бадахшон парвариши занбӯри асал хеле фоидаовар аст. Агар касе як ё ду қуттӣ дошта бошад, дар мавсим дасти кам то 50 кг асал мегирад. Асали ин минтақа дар баробари поку ширин будан боз хусусияти шифобахшӣ низ дорад, зеро  мо кӯшиш мекунем, ки  ҳар сари чанд вақт макони занбӯрҳоро тағйир диҳем ва қуттиҳоро ба баландтарин доманакӯҳҳо барем. Ин имконият медиҳад, ки занбӯрҳо аз гулу буттаҳои шифоӣ бештар баҳра баранд ва ба ҷои як ё ду имкон дорад то се маротиба ҳосил диҳанд.