Баргузории Фестивали истеъдод ва ҳунарҳои донишҷӯён дар Боғи Ирам

Душанбе, 26.05.2016 /АМИТ «Ховар»/. Имрӯз дар Боғи Ирам бо ташаббуси Вазорати маориф ва илми Ҷумҳурии Тоҷикистон  кушодашавии Фестивали истеъдод ва ҳунарҳои донишҷӯёни муассисаҳои  таҳсилоти миёнаи касбии Ҷумҳурии Тоҷикистон баргузор гардид.
Ба иттилои Ҷалолиддин Амиров, сармуттахассиси раёсати таҳсилоти ибтидоӣ ва миёнаи касбии Вазорати маориф ва илм дар фестивали мазкур аз 65 муассисаи таҳсилоти миёнаи касбии ҷумҳурӣ 60 муассиса иштирок намуда,  дастовардҳои худро пешкаши тамошобинон гардониданд.
Мақсад аз баргузории Фестивали истеъдод ва ҳунарҳои донишҷӯёни муассисаҳои  таҳсилоти миёнаи касбии Ҷумҳурии Тоҷикистон дарёфти истеъдодҳои ҷавон, муттаҳид намудани донишҷӯёни таҳсилоти миёнаи касбӣ,  пешгирӣ намудани гаравиши ҷавонон ба ҳар гуна ҳизбу ҳаракатҳои  террористиву экстремистӣ ва дигар амалҳои номатлуб, ба мисли нашъамандиву тамокукашӣ буд.