Котиби генералии ФИФА интихоб шуд

Душанбе, 17.05.2016 /АМИТ «Ховар»/. Дар ҳаёти Федератсияи футболи ҷаҳонӣ тағйирот ворид гардид. Дар конгрессе, ки дар Мехико ҷараён гирифт, ба мансаби Котиби генералии он бори аввал зан-бону Фатма Самура аз Сенегал интихоб шуд.
Дар Конгресс аз Тоҷикистон Хуршед Файзуллозода ва Дилшод Ҷӯраев -ноибони президенти Федератсияи футболи мамлакат иштирок карданд. Ба ғайр аз он ки Котиби генералии Федератсияи футболи ҷаҳонӣ интихоб гардид, ҳамчунин ду федератсияи нав ба ҳайати он шомил шуданд. Минбаъд Косово ва Гибралтар ҳаққи узвияти худро дар Федератсияи футболи ҷаҳонӣ пайдо карданд ва зери парчами он фаъолият хоҳанд кард. Шумораи аъзои ФИФА акнун ба 211 давлат баробар шуд.
То ба ҳанӯз таҳримҳои ин ниҳод ба федератсияҳои футболи Кувайт ва Бенин таъсир доранд ва дар сурати барҳам додани ихтилофот дар қонунгузориашон онҳо баргардонда хоҳанд шуд.
Дар конгресс ҳамчунин масоили молиявии Федератсияи футболи ҷаҳонӣ мавриди баррасӣ қарор гирифт ва ба қавли Президенти он Ҷанни Инфонтинно ФИФА алакай аз буҳрон берун шудааст.