Пирӯзии шашуми «Истиқлол» дар мусобиқаи Лигаи олӣ

Душанбе,16.05.2016/АМИТ «Ховар»/. 14-15 май бозиҳои даври шашуми мусобиқаи қаҳрамонии лигаи олии футболи Тоҷикистон барпо гардиданд. Дар ду бозӣ мизбонон, дар дутоаш меҳмонон ғолиб омаданд ва як бозӣ бо ҳисоби мусовӣ хотима ёфт. Дастаи футболи «Истиқлол»-и Душанбе, ки дар майдони худ бар тими «Вахш»-и Қурғонтеппа бо ҳисоби калони 6:3 пирӯз шуд, бо 18 имтиёз дар ҷадвали мусобиқа дар мақоми аввал аст. «Истиқлол» ягона дастаест, ки бохт надорад.
Дастаи футболи «Хайр»-и Ваҳдат дар меҳмонӣ тими «Хуҷанд»и-Хуҷандро бо ҳисоби калони 5:1 шикаст дод, бо 11 имтиёз дар ҷойи дуюм мебошад.
Тими «Ҳосилот»-и Фархор, ки бозиро бо дастаи мизбон — «РегарТадАЗ»-и Турсунзода бо ҳисоби мусовии 2:2 анҷом дод, бо 10 имтиёз ҷойи сеюмро касб кардааст.
Дар ду бозии дигари даври шашум дастаи футболи ССКА «Помир»-и Душанбе дар майдони худ «Равшан»-и Кӯлобро бо ҳисоби 3:1 ва «Барқчӣ»-и Душанбе дар сафар дастаи «Парвоз»-и Бобоҷон Ғафуровро бо ҳисоби 2:1 мағлуб карданд.