Тими мунтахаби Тоҷикистон бар мунтахаби легионерҳо бо ҳисоби 5:2 ғолиб омад

Душанбе, 27.05.2016 /АМИТ «Ховар»/. Пеш аз вохӯрии плей-оффи бозиҳои интихобии Чемпионати Осиё оид ба футбол бо тими мунтахаби Бангладеш шоми дирӯз дар варзишгоҳи марказии шаҳри Душанбе сармураббии дастаи мунтахаби мамлакат Ҳаким Фузайлов дар як вохӯрии таҷрибавӣ ва санҷишиву дӯстона бо тими легионерҳои Тоҷикистон бозингарони  дастаи мунтахабро имтиҳон кард.
Ҳайати даста дар нимаи аввал нисбат ба бозиҳое, ки соли равон дар рақобатҳои интихобии Ҷоми ҷаҳон 2018 ҳунарнамоӣ карда буд, тафовут дошт. Бозингарони ҷавон Табрези Давлатмир ва Амирбек Ҷӯрабоев ба ҳайати бозингароне, ки дар қисми аввал ҳунарнамоӣ карданд, ҳамроҳ шуда буданд.
Нимаи аввали вохӯрӣ бо бартарии легионерҳо гузашт ва баъди голҳои Саломон Течи ва Андоҳ Наполеон дастаҳо бо натиҷаи 2:0 ба танаффус рафтанд.
Дар нимаи дуввум баъди тағйир хӯрдани ҳайат ҳунарнамоии футболбозонии  тими миллӣ дигар шуд ва бо голҳои задаи Манучеҳр Ҷалилов(3 тӯб),Умед Шарипов ва Парвиз Умарбоев миллипӯшони кишварамон бо натиҷаи 5:2 ғалаба карданд.
Самураббии даста Ҳаким Фузайлов дар поёни бозӣ дар суҳбат ба  «Ховар» гуфт: «Аз бозии футболбозон қаноатманд шудем ва акнун дар даста онҳое боқӣ мемонанд, ки аз санҷиш гузаштанд».
Ёдовар мешавем, ки сармураббии тозаинтихоби тими мунтахаби кишвар ба ин тамринҳо 29 нафар бозингаронро ҷалб карда буд.