В. Матвиенко мухолифи ҷорӣ намудани низоми раводид бо кишварҳои Осиёи Марказӣ

Душанбе, 19.05.2016 / АМИТ «Ховар» /. Раиси Шӯрои Федератсияи Русия Валентина Матвиенко мухолифи ҷорӣ намудани низоми раводид бо кишварҳои Осиёи Марказӣ пас аз ҳодисаи оромгоҳи Хован  баромад кард, зеро «ин ҳодисаи фавқулода ба  сиёсати муҳоҷират  рабт надорад».
Пештар оид ба зарурати ҷорӣ намудани раводид барои шаҳрвандони Тоҷикистон ва Узбекистон  муовини аввали раиси Кумитаи Шӯрои Федератсия оид ба мудофиа ва амният Евгений Серебренников изҳори назар кард.
«Ман ҳеҷ зарурати ҳатто баррасии имконияти  ҷорӣ намудани низоми раводидро намебинам. Набояд дар фазои пасошӯравӣ бо чунин омил фитнаангезӣ намуд. Ва он чӣ дар оромгоҳи Хован рух дод, ҳеҷ рабте  бо сиёсати муҳоҷират надорад», — гуфт Матвиенко ба хабарнигорон.
Рӯзи шанбе дар бузургтарин оромгоҳи  Маскав- Хован ҷанҷол бархост, ки дар он  бино ба маълумоти Вазорати корҳои дохилӣ 200 нафар иштирок намуда, се кас кушта шуданд  ва 30 тани дигар ҷароҳат бардоштанд. Мувофиқи  тафтишоти пешакӣ, ин низоъ бо сабаби тағйир ёфтани ҳудуди  хизматрасонӣ  дар оромгоҳ будааст.