Занони Кӯлоб тарғибгари сулҳу Ваҳдати миллиянд

Кӯлоб, 16.06.2016 /АМИТ «Ховар»/. Бахшида ба 19-солагии Рӯзи Ваҳдати миллӣ ва 25-солагии Истиқлолияти давлатии Ҷумҳурии Тоҷикистон дирӯз бо ташаббуси Кумитаи иҷроияи Ҳизби Халқии Демократии  Тоҷикистон  дар шаҳри Кӯлоб дар Театри вилоятии мусиқӣ- мазҳакавии ба номи Сайдалӣ Вализодаи  шаҳри Кӯлоб таҳти унвони «Нақши занони даврони Истиқлолият дар рушду нумӯи Тоҷикистон» ҳамоиши занони ҳизбӣ баргузор шуд.
Раиси Кумитаи иҷроияи ҲХДТ дар шаҳри  Кӯлоб Саъбагул Валиева зикр кард, ки воқеан занони тоҷик аз хушбахттарин занони дунё мебошанд, ки аз баракати Истиқлолият дар фазои сулҳу оромӣ ба тарбияи насли ояндасоз машғуланд. Ин ҳама дастовардҳои бузург бо кӯшишу заҳматҳои шабонарӯзии Асосгузори сулҳу Ваҳдати миллӣ,  Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошад ва  ғамхориҳои Пешвои миллат нисбат ба занону модарон беназир аст. Бо ин мақсад Кумитаи иҷроияи ҲХДТ дар ш. Кӯлоб тасмим гирифтааст, ки чунин ҳамоишро баргузор намояд. Саъбагул Валиева иброз дошт, ки санаҳои муҳими таърихӣ, Ваҳдати миллӣ ва Истиқлолиятро бо сарбаландона пешвоз гирифта, мо, занонро мебояд, ки барои мустаҳкамии пояҳои ин дастовардҳои беназир ҳамеша сахмгузор бошем.
Дар қисмати фарҳангии ҳамоиш аз ҷониби ҳунармандони театр суруду таронаҳо пешкаши аҳли толор гардиданд, ки ин ба ҳамоиш ҳусни дигар зам намуд.