Ҷилавгирӣ аз воридоти молҳои қочоқӣ аз Қирғизистон

Душанбе, 14.07.2016/АМИТ «Ховар»/. Кормандони гумрук дар шимоли кишвар аз қочоқи беш аз 20 ҳазор метр матоъ ва миқдори зиёди либос,  инчунин маҳсулоти косметикӣ ва коғаз аз Қирғизистон ба Тоҷикистон ҷилавгирӣ карданд.
Бинобар иттилоъи дафтари матбуоти мақомоти гумруки ҷумҳурӣ зимни гузаронидани муоинаи гумрукӣ аз дохили воситаи нақлиёти тамғаи «Газел» дар деҳаи Қотмаи ноҳияи Бобоҷон Ғафуров ба маблағи беш аз 241 ҳазор сомонӣ матоъ ва либосворӣ ошкор гардид.
Муайян шуд, ки ин миқдор молҳо ба шаҳрванди 28 сола К.Р., ки истиқоматкунандаи ноҳияи Бобоҷон Ғафуров аст, тааллуқ дошта, мавсуф  молҳои зикршударо бидуни назорати гумрукӣ, ғайриқонунӣ аз Қирғизистон ба Тоҷикистон ворид намудааст. Нисбат ба амали шаҳрванд К.Р  парвандаи ҷиноӣ бо моддаи 289 қисми 1-и Кодекси ҷиноии Ҷумҳурии Тоҷикистон оғоз карда шуда,  ба прокуратураи ноҳияи Бобоҷон Ғафуров ирсол гардидааст.