Н. Салимзода: «Беш аз 350 нафар ҷавонон донишҷӯи ДДТХ гардиданд»

Душанбе, 13.07.2016. /АМИТ «Ховар/. Беш аз 350 нафар донишҷӯён бори нахуст ба Донишгоҳи давлатии тиббии Хатлон, ки дар ноҳияи Данғара воқеъ аст, қабул карда шуданд». Дар ин хусус ба намояндагони  расонаҳои хабарӣ вазири тандурустӣ ва ҳифзи иҷтимоии аҳолии Ҷумҳурии Тоҷикистон  Нусратулло Салимзода  иттилоъ дод.
Бояд тазаккур дод, ки Донишгоҳи давлатии тиббии Хатлон бо Қарори Ҳукумати Ҷумҳурии Тоҷикистон охири моҳи феврали соли равон ташкил карда шудааст.
Ҳамзамон вазири тандурустии кишвар бо дахли  беҳтар намудани сифати тарбияи кадрҳо ва рушди илми тиб дар ҷумҳурӣ, иброз дошт, ки  дар Донишкадаи  таҳсилоти баъдидипломии  кормандони соҳаи тандурустии  Ҷумҳурии Тоҷикистон,   дар нимсолаи аввали соли равон ҳудуди 2200 нафар шунавандагон  ба таҳсил фаро гирифта шуданд, ки аз ин омор беш аз 1000 нафарро  табибон ва қариб 1200 нафарро  кормандони миёнаи тиббӣ ташкил медиҳанд.