Санъат Асо: «Дар иншоотҳои сохтмонӣ ва корхонаҳои саноати куҳӣ оддитарин қоидаҳои бехатарӣ риоя карда намешаванд»

Душанбе, 15.07.16. /АМИТ «Ховар»/. Бинобар риоя накардани қоидаҳои бехатарӣ дар вақти бурдани корҳои истихроҷӣ  дар иншоотҳои сохтмонӣ ва корхонаҳои саноати кӯҳӣ дар шашмоҳаи аввали соли ҷорӣ Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати ҶТ 20 ҳодисаи нохуш, ки дар натиҷаи он 14 нафар ҳалок  ва 14 нафар ҷароҳати ҷисмонӣ бардоштаанд,  ба қайд гирифта шуданд.
Ин нуқтаро зимни нишасти хабарӣ Раҳим Санъат Асо,  сардори хадамоти мазкур зикр намуда, аз суст будани назорат оид ба риоя накардани талаботи дастурамали қоидаҳои бехатарӣ изҳори нигаронӣ  намуд.
Ба иттилои сардори хадамот,  ҳодисаҳои нохуш бештар зимни анҷоми корҳои зеризаминӣ дар Нерӯгоҳи барқии обии «Роғун» ва Корхонаи  саноати кӯҳии Тоҷикистону  Чин  «Зарнисор» рух додаанд. Дар байни фавтидагон ва ҷароҳатбардоштагон  чанд нафар шаҳрвандони Чин низ мебошанд.
«Аз тарафи коргарон оддитарин қоидаҳои бехатарӣ ҳангоми фаъолият, аз ҷумла истифода набурдани камарбанд ва сарпӯши муҳофизатӣ риоя карда намешаванд»,- афзуд ӯ.
Ба иттилои Раҳим Санъат Асо, ҳодисаҳои нохуши бамаломада мавриди санҷиш ва тафтишоти махсуси техникӣ қарор дода шуда, парвандаҳо ба мақомоти ҳифзи ҳуқуқ исрол карда шуд.