Ҳалокати 5 нафар дар садамаи нохуши нақлиётӣ дар ноҳияи Ҳисор

Душанбе, 23.09.2016. /АМИТ «Ховар»/. 22 сентябр тахминан соати 01:30 ронандаи мошини тамғаи «Митсубиси», марди 23-солаи сокини ноҳияи Ҳисор, дар ҳолати мастӣ, ҳангоми ҳаракат дар ҳудуди деҳаи Навбаҳори ноҳияи мазкур бехатарии ҳаракат дар роҳро таъмин карда натавониста, ба самти муқобили роҳ баромада, ба мошини тамғаи «Опел-Астра», таҳти идораи марди 41-солаи сокини ноҳияи Бохтар бархӯрдааст.
Тавре аз Вазорати корҳои дохилии Ҷумҳурии Тоҷикистон хабар доданд, дар натиҷаи ин садамаи марговар 5 нафар шаҳрвандон, аз ҷумла, ронандаи мошини тамғаи «Опел-Астра», мусофирони мошини мазкур занҳои 41 ва 47-солаи сокинони шаҳри Сарбанд, зани 53-сола ва марди 53-солаи сокинони шаҳри Қӯрғонтеппа ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расидаанд.
Дар ин бархӯрд мусофири мошини «Опел-Астра», писарбачаи 12-сола, ронандаи мошини тамғаи «Митсубиси» ва мусофири ҳамин мошин- марди 25-солаи сокини ноҳияи Ҳисор ҷароҳатҳои ҷисмонӣ бардошта, дар беморхона бистарӣ гаштаанд.