Иштироки Пешвои миллат дар намоиши маҳсулоти кишоварзӣ ва оғози ғунучини пахта дар маҳаллаи «Бахт»-и ноҳияи Зафаробод

Сентябрь 12, 2016 09:25

Душанбе, 12.09.2016 /АМИТ «Ховар»/. Баъди ба истифода додани Муассисаи таҳсилоти миёнаи умумии №20 Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар хоҷагии деҳқонии «Бахт» аз ҷараёни оғози ғунучини пахта ва фаъолияти соҳаи кишоварзии ноҳия шинос шуданд.

Тавре аён гардид, дар хоҷагии деҳқонии «Бахт» ҷамъоварии ҳосили пахта тавассути мошинҳои махсуси пахтачинӣ сурат мегирад. Ба Президенти мамлакат Эмомалӣ Раҳмон иттилоъ дода шуд, ки имсол аз ҷониби хоҷагии деҳқонии «Бахт» дар майдони 10 гектар кишти пахта гузаронида шудааст ва ҳосилғундорӣ дар ин хоҷагӣ пурра бо истифода аз техникаҳои пахтачинӣ ба роҳ монда мешавад. Дар маҷмуъ дар ноҳияи Зафаробод бошад имсол хоҷагидорон дар майдони 9 ҳазору 325 гектар пумбадона кишт намудаанд, ки ҳосили қариб 300 гектари он тавассути техникаҳои махсуси пахтачинӣ ҷамъоварӣ карда мешавад.

Ҳамзамон иттилоъ дода шуд, ки маҷмуъан кишоварзони ноҳияи Зафаробод имсол дар майдони 6 ҳазору 600 гектар ғалладонагиҳо, 8 гектар картошка, 416 гектар  сабзавот, 1 ҳазору 300 гектар полезиҳо ва 9 ҳазор гектар зироати хӯроки чорво кишт намуданд ва масоҳати умумии боғу токзор дар ноҳия бошад 976 гектарро ташкил медиҳад.

Аз рӯйи ҷамъоварӣ ва муайян кардани ҳосили интизории пахта аз тарафи мутахассисон дар назар аст, ки имсол хоҷагиҳои пахтакории ноҳия то 20 ҳазор тонна пахта ҷамъоварӣ менамоянд ва ин нишондод нисбат ба соли гузашта 6 ҳазор тонна зиёд мебошад.

Сипас Сарвари давлат дар намоиши дастовардҳои кишоварзони ноҳияи Зафаробод, ки дар ҳамин хоҷагӣ ташкил гардида буд, иштирок намуданд.

Пешвои миллат Эмомалӣ Раҳмон зимни тамошои намоиши маҳсулоти кишоварзӣ ба фаъолияти самарабахш ва натиҷаҳои назаррасу дастовардҳои хоҷагидорони ноҳия баҳои баланд доданд. Дар намоишгоҳ аҳли заҳмати ноҳия бештар аз 40 номгӯйи маҳсулоти кишоварзӣ аз қабили полезиҳо, ғалладонагиҳо, лубиёгиҳо, мевагиҳо, хушкмевагиҳо, маҳсулотҳои нонӣ ва асалро, ки дар хоҷагиҳои кишоварзии 5 ҷамоати шаҳраку деҳоти ноҳия истеҳсол карда мешавад ба маъраз гузоштанд.

Сарвари давлат таъкид намуданд, ки маҳс бо меҳнати пайваста ва фидокорона мо метавонем ба амалишавии яке аз ҳадафҳои асосии Ҳукумати Ҷумҳурии Тоҷикистон-таъмини амнияти озуқаворӣ ноил гардем ва дар ин замина сатҳи зиндагии мардуми кишвар беҳтару хубтар шавад. Тибқи иттилоъ дар ноҳияи Зафаробод 3 ҳазору 786 хоҷагиҳои кишоварзӣ мавҷуд аст, ки аз ин шумора 3 ҳазору 639 ададаш хоҷагиҳои деҳқонии инфиродии оилавӣ мебошад. Имсол дар маҷмуъ аҳли заҳмати ноҳия дар масоҳати 28 ҳазору 255 гектар кишти зироати гуногуни кишоварзӣ гузаронида аз он ҳосили дилхоҳ ба даст меоваранд.

Сентябрь 12, 2016 09:25

Хабарҳои дигари ин бахш

Дар Хатлон 165 бинои нави муассисаҳои таълимӣ бунёд карда мешавад
6 август дар вазоратҳои рушди иқтисод ва савдо, саноат ва технологияҳои нав, Кумитаи давлатии сармоягузорӣ ва идораи амволи давлатӣ ва Агентии омор нишасти матбуотӣ баргузор мегардад
Суханронии Президенти Ҷумҳурии Тоҷикистон Эмомалӣ Раҳмон дар Конфронси сеюми СММ оид ба кишварҳои рӯ ба тараққии маҳсур дар хушкӣ
Президенти Ҷумҳурии Тоҷикистон Эмомалӣ Раҳмон дар Конфронси сеюми СММ оид ба кишварҳои рӯ ба тараққии маҳсур дар хушкӣ иштирок намуданд
Президенти Ҷумҳурии Тоҷикистон Эмомалӣ Раҳмон дар мулоқоти сарони давлатҳои Осиёи Марказӣ иштирок намуданд
Президенти Ҷумҳурии Тоҷикистон Эмомалӣ Раҳмон дар маросими истиқболи расмии роҳбарони давлатҳо ва ҳайатҳои Конфронси сеюми СММ оид ба кишварҳои рӯ ба тараққии маҳсур дар хушкӣ иштирок намуданд
Имрӯз дар Тоҷикистон гармии ҳаво ба 37 дараҷа мерасад
ТАҚВИМИ АМИТ «ХОВАР»: имрӯз 5 август, сешанбе, 217-умин рӯзи соли 2025 аст
Имрӯз дар Суди Олии иқтисодӣ, Хадамоти иҷро, Маркази тадқиқоти стратегӣ, «Амонатбонк» ва Маркази миллии тестӣ нишасти матбуотӣ баргузор мегардад
Пешвои миллат Эмомалӣ Раҳмон бо Раиси халқ маслиҳатии Туркманистон Гурбонгулӣ Бердимуҳамедов мулоқот намуданд
Президенти Ҷумҳурии Тоҷикистон Эмомалӣ Раҳмон бо сафари корӣ вориди шаҳри Туркменбошии Туркманистон шуданд
Кормандони Кумитаи ҳолатҳои фавқулода ва мудофиаи гражданӣ 20 нафарро аз ғарқшавӣ наҷот доданд