Таҷлили 25-солагии Истиқлолияти давлатии Ҷумҳурии Тоҷикистон дар Маскав

Душанбе, 14.09.2016 /АМИТ «Ховар»/.  Сафорати Ҷумҳурии Тоҷикистон дар Федератсияи Русия дар меҳмонхонаи Ритс-Карлтони шаҳри Маскав ба муносибати 25-умин солгарди  Истиқлолияти Ҷумҳурии Тоҷикистон бо шукуҳу шаҳомати хосса маросими идона барпо намуд.
Дар ҷамъомад намояндагони ниҳодҳои давлатӣ, доираҳои илму фарҳангии Федератсияи Русия, корпуси дипломатӣ, расонаҳои иттилоотии Федератсияи Русия ва Ҷумҳурии Тоҷикистон, намояндагони ҷамъияти тоҷикон, донишҷӯён ва шаҳрвандони тоҷик, ки феълан дар Русия таҳсил ва  фаъолият доранд, ширкат варзиданд.
Дар ҷамъомад Сафири Фавқулода ва Мухтори Ҷумҳурии Тоҷикистон дар Федератсияи Русия Имомуддин Сатторов доир ба аҳаммияти сарнавиштсози Истиқлолият дар ташаккули давлатдории навини тоҷикон ва дастовардҳои беназири кишвар, ки маҳз дар ҳамин даврон ба даст омадаанд, аз ҷумла гуфт, ки: «Мо аз он шукр менамоем, ки дар  лаҳзаҳои душвортарин барои Тоҷикистон ва мардуми он, раҳбарии кишварро Асосгузору сулҳу ваҳдати миллӣ, Пешвои миллат, Президенти Ҷумҳурии Тоҷикистон Эмомалӣ Раҳмон ба уҳда гирифт. Маҳз бо шарофати худфидоӣ, хирадмандӣ, ояндабинӣ ва иродаи мустаҳками ин шахс сулҳу субот ва рушди пайваста дар кишвар ҳукмфармо гардид».
Муовини вазири корҳои хориҷии Федератсияи Русия Василий Небензя аз номи роҳбарияти кишвараш ба давлат ва мардуми тоҷик ҷашни Истиқлолияти давлатиро муборакбод гуфта, Тоҷикистонро шарики калидӣ ва боэътимоди Русия дар Осиёи Марказӣ номид.
Дар даромадгоҳи макони ҷамъомад намоишгоҳи аксҳо аз дастовардҳои даврони истиқлолият манзури меҳмонон гардонида шуд, ки ҳозиринро бо дастовардҳои кишвар дар самтҳои сиёсӣ, иқтисодӣ, фарҳангу маориф ва табиати зебою имкониятҳои ғании сайёҳии Тоҷикистон ошно менамуд.