Даври ниҳоии озмуни «Донишҷӯи сол — 2016» оғоз гардид

Душанбе, 20.10.2016 /АМИТ «Ховар»/. Имрӯз дар Кумитаи ҷавонон, варзиш ва сайёҳии назди Ҳукумати ҶТ миёни донишҷӯёни муассисаҳои таҳсилоти олии касбии мамлакат даври ниҳоии озмуни ҷумҳуриявӣ таҳти  унвони «Донишҷӯи сол — 2016» оғоз гардид.
Дар  даври ниҳоии озмун  17 нафар донишҷӯён аз донишгоҳу донишкадаҳои  кишвар, аз ҷумла ВМКБ, вилоятҳои Суғду Хатлон, шаҳри Душанбе  ва ноҳияҳои тобеи марказ  иштирок намуданд.
Тибқи низомномаи шартҳои озмуни ҷумҳуриявӣ дар рӯзи аввал иштирокчиён  дар мавзӯи «Ҷавонон пайрави Пешвои миллат ва муҳофизи дастовардҳои Истиқлолияти давлатӣ» иншо навиштанд.
Беҳтарин донишҷӯи сол аз ҷониби ҳайати Комиссияи босалоҳият, ки аз ҳисоби намояндагони вазорату идораҳои дахлдори кишвар таъсис ёфтааст, муайян гардида, бо диплом, сипоснома ва туҳфаҳои хотиравӣ сарфароз гардонида мешаванд.
Ёдрас мешавем, ки бо мақсади дарёфти ҷавонони лаёқатманду соҳибистеъдод, донандагони забонҳои хориҷӣ ва техникаву технологияи замони муосир ва дар ин замина, ҳавасманд намудани донишҷӯёни фаъол ҳамасола озмуни ҷумҳуриявии «Донишҷӯи сол» баргузор мегардад
Дар ин бора ба АМИТ «Ховар» аз Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон  хабар доданд.