Лафзи гуфтори дарӣ ширинтар аст…

Хоруғ, 04.10.2016. /АМИТ «Ховар»/. Дар муассисаи давлатии Мактаби президентии шаҳри Хоруғ бахшида ба Рӯзи забони давлатӣ суҳбати «мизи гирд» баргузор шуд. Дар он дар баробари омӯзгорони синфҳои ибтидоӣ, ҳамчунин волидони хонандагон низ ширкат доштанд. Муовини директор оид ба тарбияи мактаби мазкур Айниддин Сомиддинов нақши забони модарӣ дар таълими фанҳои мухталифи дарсиро муҳим арзёбӣ намуда, гуфт: «Бидуни донистани забони модарӣ аз худ намудани илмҳои дигар ғайриимкон аст. Аммо забони модариро кӯдакон аз давраи қадам гузоштан ба остонаи таълимгоҳ ёд мегиранд, зеро дар хона ва кӯча аксарияти онҳо бо лаҳчаи маҳали зисти худ гуфтугӯ мекунанд. Шумо мебинед, ки имрӯз ҳатто дар шабакаҳои иҷтимоӣ бо ҳамин забони пур аз иштибоҳ ва дурушту дур аз мантиқ бо ҳам муколима мекунанд. Иллати аслии ин падидаро берун аз мактаб ҷустан лозим нест, ҳар айб, ки ҳаст, дар таълиму тарбияи мост. Мо борҳо мушоҳида намудем, ки омӯзгорон худашон ҳангоми дарс бо лаҳҷаи худ бо шогирдон суҳбат мекунанд. Бояд иқрор шавем, ки луғати забони адабии мо хароб аст. Худамон ба ҷуз китобҳои дарсӣ аз китобҳои илмӣ-бадеӣ кам истифода мебарем ва аз кӯдакон ҳам тақозо намекунем, ки шеърҳои шоирони классик, ба мисли Рӯдакӣ, Фирдавсӣ, Хайём, Аттору Саноиро мутолиа кунанд».
Ба андешаи Айниддин Сомиддинов: «кӯдаке, ки дар хурдсолӣ назму насри шоирони классикиро мутолиа карда бошад, калон шуда, соҳиби кадом касбе, ки нагардад, хушсухану ширингуфтор хоҳад шуд».
Муовини директори Мактаби президентӣ аз омӯзгорон даъват намуд, ки барои тозагии забони давлатӣ талош намоянд, зеро забони тоҷикӣ-форсӣ дар дунё чун забони шевою равон шинохта шудааст ва дар аксарияти маврид мардуми ҷаҳон дар ҳаққи ин забон чунин мегӯянд: «форсӣ шакар аст».
Дар ин суҳбати судманд омӯзгорони Мактаби президентӣ изҳор намуданд, ки ба танҳоӣ наметавонанд забони кӯдаконро бо меъёрҳои забони адабӣ мутобиқ созанд ва аз волидон низ хоҳиш намуданд, ки дар ин кор ба онҳо кумак расонанд.