Ғалабаи шоёни дастаи мунтахаби Тоҷикистон бар Туркманистон. Ҳисоб 3:0

Ноябрь 10, 2016 09:46

Душанбе, 10.11.2016 /АМИТ «Ховар»/. Дастаи мунтахаби футболи Тоҷикистон дар Варзишгоҳи марказии ҷумҳуриявӣ шоми дирӯз бар дастаи мунтахаби Туркманистон яке аз ғалабаҳои намоёни худро таҳти роҳбарии сармураббӣ Ҳаким Фузайлов бо натиҷаи 3:0 ба даст овард. Ин вохӯрии рафиқонае буд, ки ҳар ду даста ҳайатҳои худро барои бозиҳои интихобии Чемпионати Осиё имтиҳон карданд ва омодагиро то моҳи марти соли оянда идома медиҳанд. Се голро ҳамлагари мунтахаби Тоҷикистон, нишонзани беҳтарини мавсимҳои соли 2015 ва 2016-и Лигаи олии Чемпионати мамлакат Манучеҳр Ҷалилов ба нишон расонд.
Ҳисоб дар вохӯрӣ дар дақиқаи 35-ум, баъд аз он ки Парвизҷон Умарбоев аз канори чапи майдон тӯбро ба назди дарвозаи дастаи мунтахаби Туркманистон равон кард, кушода шуд. Манучеҳр Ҷалилов бо як ҷасти зебо бо зарбаи сар тӯбро ба дарвозаи Маммет Оразмуҳаммедов равон кард. Баъди чор дақиқаи голи аввал ҳаммуаллифи голи дуввуми Манучеҳр муҳофизатгари дастаи «Дунав»-и Булғория Искандар Ҷалилов гардид. Ин навбат аз канори рости майдон бо партофти олияш Искандар Манучеҳрро дар назди дарвоза пайдо кард ва тӯби дуввум вориди дарвозаи меҳмонон гардид. Голи сеюм ба маҳорати фардии Манучеҳр Ҷалилов робита дорад. Ӯ муҳофизатгаронро дар назди дарвоза фирефта, голи сеюмашро ба самар расонд ва хетт-трик намуд.
Мутаассифона, корти дуюми зарде, ки Ҷаҳонгир Эргашев дар поёни бозӣ дар ҳолати на он қадар мушкил сазовор шуд, ба корти сурх табдил ёфт ва ин бозингар дар вохӯрии навбатии дастаи мунтахаби Тоҷикистон бо Афғонистон 13-уми ноябр иштирок намекунад.
Бо ҳамин тартиб, дар ҳашт вохӯрии байни дастаҳои мунтахаби Тоҷикистон ва Туркманистон ҳисоби ғалабаҳо баробар шуд. Акнун Тоҷикистон ва Туркманистон се маротибагӣ ҳамдигарро мағлуб карда, ду маротиба бозиро мусовӣ анҷом додаанд.

Бозии рафиқона
ТОҶИКИСТОН — Туркманистон 3:0

Муаллифи голҳо: Манучеҳр Ҷалилов, 35 (1:0). Манучеҳр Ҷалилов, 39 (2:0). Манучеҳр Ҷалилов, 60 (3:0).

Тоҷикистон: Абдуазиз Маҳкамов, Сиёвуш Асроров, Амирбек Ҷӯрабоев, Аҳтам Назаров, Искандар Ҷалилов (Эраҷ Раҷабов, 88), Нуриддин Давронов (Фаридун Шарифов, 89), Фатҳулло Фатҳуллоев (Муҳаммадҷони Ҳасан, 63), Нозим Бобоҷонов (Ҷаҳонгир Алиев, 76), Парвизҷон Умарбоев (Муҳсинҷон Парпиев, 83), Ҷаҳонгир Эргашев, Манучеҳр Ҷалилов (Бахтиёр Чориев, 69).

Туркманистон: Маммет Оразмухаммедов (Батир Гелдиев, 46), Бегли Мередов (Сердаралӣ Атаев, 84), Шохрат Суюнов, Мекан Сапаров, Арсланмурат Аманов, Бахтияр Хоҷаахмедов, Сулейман Мухадов (Вахит Оразсахедов, 66), Сердар Аннаоразов, Артур Геворкян, Иля Тамуркин, Элман Тагаев (Гуванч Абилов, 66).

Огоҳӣ: Ҷаҳонгир Алиев (Тоҷикистон), Элман Тагаев, Арсланмурат Аманов (Туркманистон).

Аз майдон ронда шуд: Ҷаҳонгир Эргашев (Тоҷикистон), 90+4 корти зарди 2-юм.

Довар дар майдон: Денис Измайлов (Қазоқистон).

Ёварони сардовар: Санҷар Искаков, Самат Тергеусизов (Қазоқистон).

Довари эҳтиётӣ: Александр Алиев (Қазоқистон).

Комиссари вохӯрӣ: Азизҷон Достиев (Тоҷикистон).

Ёдовар мешавем, ки 9 ноябр дар Варзишгоҳи марказии ҷумҳуриявӣ бозии байни дастаҳои мунтахаби Тоҷикистон ва Туркманистонро 11 000 нафар тамошобин тамошо карданд.

Ноябрь 10, 2016 09:46

Хабарҳои дигари ин бахш

Федератсияи байналмилалии гӯштингирии Тоҷикистон дар Русия, Эрон ва Ҳиндустон намояндагиҳояшро ифтитоҳ намуд
Имрӯз дар Душанбе Чемпионати Тоҷикистон оид ба гӯштин оғоз мегардад
ҶОМИ ФФТ-2023: бозиҳои даври аввали марҳилаи муқаддамотӣ дар минтақаи Душанбе баргузор шуданд
ФУТБОЛ. Мунтахаби ҷавонони Тоҷикистон (U-20) дар Туркия бо дастаи «Бухоро» бозии санҷишӣ анҷом дод
Федератсияи гӯштингирии Тоҷикистон дар Швейтсария ҳамчун Федератсияи байналмилалии гӯштингирӣ сабти ном карда шуд
ФУТБОЛ. Доварони Тоҷикистон дар машғулияти CAFA иштирок доранд
Президенти Федератсияи дзюдои Тоҷикистон Исмоил Маҳмадзоир бо Сафири Ҷопон Тошиҳиро Айки мулоқот намуд
Федератсияи футболи Тоҷикистон ва Ассотсиатсияи футболи Чин ҳамкории дуҷонибаро баррасӣ намуданд
Дар Тоҷикистон мусобиқаҳои байналмилалӣ оид ба марафони шиноварӣ доир карда мешаванд
ҶОМИ ФФТ-2023. Имрӯз дар Ҳисор марҳилаи муқаддамотии мусобиқот дар минтақаи Душанбе оғоз мегардад
ФУТБОЛ. Дастаи мунтахаби ҷавонони Тоҷикистон (U-20) бо дастаи шомили Cуперлигаи Узбекистон бозии санҷишӣ мегузаронад
Гӯштини тоҷикӣ мақоми байналмилалӣ гирифт