Конститутсия-санади муқаддасу тақдирсози миллат

Душанбе, 05.11.2016. /АМИТ «Ховар»/. Дирӯз дар Донишгоҳи давлатии тиҷорати Тоҷикистон дар мавзӯи «Конститутсия-санади муқаддасу тақдирсози миллат» ҷамъомад баргузор гардид. Дар он роҳбарияти Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон, ректори Донишгоҳи давлатии тиҷорати Тоҷикистон Шарифзода Мумин ва олимону муҳаққиқони ҷавон иштирок намуданд. Дар ин бора аз Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ба АМИТ «Ховар» хабар доданд.
Муовини раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Ҳабибулло Амирбекзода аз номи тамоми ҷавонону варзишгарон иштирокчиёнро бо Рӯзи Конститутсияи Ҷумҳурии Тоҷикистон табрик гуфт. Ӯ изҳор дошт, ки «қабули Конститутсия дар таърихи кишвари мо аз ҷумлаи рўйдодҳои муҳимтарини сиёсие мебошад, ки арзиш ва аҳамияти он бо гузашти солҳо бештар мегардад».
Мумин Шарифзода таъкид кард, ки: «Маҳз дар раванди таҳаввулоти бузурги асри ХХI ҷавонон чун неруи созандаву бунёдкор метавонанд дар таҳкими меъёрҳои конститутсионӣ нақши бориз дошта бошанд. 6-уми ноябри соли 1994 санаи муқаддасу тақдирсози миллати тоҷик ба шумор меравад, зеро қабули Конститутсияи нав дар асоси меъёрҳои демократӣ имкон дод, ки миллати тоҷик ба марҳилаи нави рушду инкишоф гомҳои устувор гузорад».