Қабули қатъномаи Даҳсолаи байналмилалии амал «Об барои рушди устувор» ифтихори тоҷикон аст

ДУШАНБЕ, 23.01.2017. /АМИТ «Ховар»/. Дар Китобхонаи миллии Тоҷикистон бахшида ба Даҳсолаи байналмилаии амал «Об барои рушди устувор» барои солҳои 2018 -2028 ҷамъомад доир гардид. Дар кори он як зумра олимону донишмандони соҳа ширкат карданд.
Муовини директори Китобхонаи миллии Тоҷикистон Гадобек Маҳмудов изҳор дошт, ки қатъномаи Даҳсолаи байналмилалии амал «Об барои рушди устувор», ки 21 декабри соли 2016 дар Маҷмааи Умумии Созмони Милали Муттаҳид сурат гирифт, ифтихори тамоми мардуми тоҷик аст. «Истиқлолияти сиёсии кишвар тамоми ҷабҳаҳои ҳаёти ҷамъиятиро дар бар гирифта, асоси рушду пешрафти Тоҷикистони азизамонро таъмин менамояд. Дар ин росто масъалаи об муҳимтарин сарчашмаи ҳаёт ва соҳаи заминавии ташаккули саноат, иҷтимоиёт, пешрафти тамоми соҳаҳои хоҷагии халқ ва некуаҳволии мардуми кишвар ба шумор меравад»,-иброз дошт мавсуф.
Дар ҷамъомад муовини сардори Раёсати захираҳои оби Вазорати энергетика ва захираҳои оби Ҷумҳурии Тоҷикистон Гул Шарифов дар мавзӯи «Тоҷикистон ва Даҳсолаи байналмилалии об барои рушди устувор», мудири кафедраи мелиоратсия, таҷдидсозӣ ва ҳифзи замини Донишгоҳи аграрии Тоҷикистон Шавкат Пӯлодов дар мавзӯи «Нақши Пешвои миллат дар ҳалли масъалаҳои глобалии об» маърӯза карда, аҳамият ва қабули ин қатъномаро муҳиму саривақтӣ ҳисобиданд.