Ҳавопаймои «Тоҷик Эйр» дар Ӯзбекистон аз муоинаи техникӣ гузашт

ДУШАНБЕ, 23.01.2017 /АМИТ «Ховар»/. Ҷамъияти саҳҳомии кушодаи «Тоҷик Эйр» соли гузашта тибқи қарордод оид ба ҳамкорӣ бо ширкати ҳавопаймоии Ҷумҳурии Ӯзбекистон ҳавопаймои худро дар ширкати «Ӯзбекистон ҳаво йӯлларӣ» аз муоинаи техникӣ гузаронд. Дар ин бора директори генералии «Тоҷик Эйр» Хайрулло Раҳимов ба хабарнигорон имрӯз зимни нишасти матбуотӣ иттилоъ дод.
«Тавре маълум аст, Ӯзбекистон аз ҷиҳати истифодаи ҳавопаймоҳои калонҳаҷм, таъмир ва омӯзиш ҷои намоёнро ишғол менамояд. Аз ҳамин сабаб мо муоинаро дар ин кишвар гузаронидем. Ҳарчанд «Тоҷик Эйр» парвозҳоро ба самти Ӯзбекистон ба роҳ намонад ҳам, соли гузашта бо ширкати Ӯзбекистон қарордод оид ба ҳамкориро ба имзо расонида буд. Агар масъалаи раводид ҳал шавад, мо имкон дорем ба шаҳрҳои Тошканд, Самарқанд ва Бухоро хатсайр ифтитоҳ намоем»,-илова намуд Хайрулло Раҳимов.
Дар айни замон иҷозат барои парвоз ба Ӯзбекистон ба ширкати ҳовопаймоии Тоҷикистон «Сомон эйр» дода шудааст.
Ширкати ҳавопаймоии «Тоҷик Эйр» ба самтҳои Москва, Санкт-Петербург, Екатеринбург, Новосибирск, Бишкек, Алмаато, Теҳрон ва Ҳиндустон парвозҳоро ба роҳ мондааст.