«Истиқлол» шартномаашро бо Петро Ковалчук қатъ кард

ДУШАНБЕ, 25.01.2017/АМИТ «Ховар»/. Чемпиони Тоҷикистон КФ Истиқлол», ки тайёриро ба мавсими нав дар Туркия идома медиҳад, шартномаи худро бо ҳимоятгари даста Петро Ковалчуки украинӣ қатъ кард. Дар ин бора саҳифаи «Истиқлол» дар Фейсбук хабар дод.
Петро Ковалчук аз нимаи аввали соли 2015 аз дастаи «Слутск»-и Беларус ба ҳайати дастаи «Истиқлол» гузашта, ду маротиба унвони чемпиони Тоҷикистон, ду маротиба Ҷом ва Суперҷоми Тоҷикистонро бо «Истиқлол» ба даст овард. Соли 2015 ҳамчун муҳофизатгари беҳтарини мавсими футбол дар Тоҷикистон эълон шуд.
Акнун Петро Ковалчук ба ҳайси футболбози озод метавонад барои худ дастаеро интихоб кунад.