Кӯдакони ятими мактаб-интернати ноҳияи Сангвор соҳиби «Тангем» гаштанд

ДУШАНБЕ, 30.01.2017 /АМИТ «Ховар»/. Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пайваста дар мулоқотҳояшон даъват менамоянд, ки ба ятимону маъюбон расондани кумакҳои моддию маънавиро зиёд намоянд. «Беҳтарин кор- ин хайру садақа кардан ба ниёзмандону ятимон мебошад ва манфиати чунин амалҳои савоб садҳо маротиба аз тӯю маъракаҳои серхароҷот, ки ҳадафи асосиашон зоҳирпарастӣ мебошад, хубтар аст»,-таъкид мекунанд Сарвари давлат.
Раёсати Донишкадаи соҳибкорӣ ва хизмати Вазорати саноат ва технологияҳои нави Ҷумҳурии Тоҷикистон ба тарбиятгирандагони Мактаб-интернати кӯдакони ятими ноҳияи Сангвор мошини тамғаи «Тангем» ва як миқдор маводи ғизоӣ тақдим намуд.
Тавре ки аз донишкадаи мазкур хабар доданд, калиди мошинро ба намояндаи мактаб-интернат Раиси иттифоқи касабаи донишкада Изатулло Насриддинов супорид.
Муовини ректори донишкада Баҳриддин Ҷабборов илова намуд, ки донишкада ин мактаб-интернатро парасторӣ мекунад ва дар арафаи тамоми иду ҷашнҳо ба тарбиятгирандагони он аз ҷониби раёсати донишкада ва ҳайати кормандон кумакҳои молӣ расонида мешаванд. Ин иқдом дар оянда низ идома меёбад.