Роҳбарони мақомоти ҳифзи ҳуқуқи шаҳри Норак нуктаҳои асосии Паёми Пешвои миллатро шарҳ доданд

НОРАК, 09.01.2017. /АМИТ «Ховар»/. Дар толори мақомоти иҷроияи ҳокимияти давлатии шаҳри Норак вохўрии намояндагони мақомоти ҳифзи ҳуқуқ бо мақсади шарҳу тафсир ва расонидани муҳтавои Паёми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мудирони шуъбаю бахшҳои дастгоҳи раиси шаҳр, фаъолону ҷавонон, кормандони корхонаю муассисаҳои шаҳр, раисони маҳаллаю деҳаҳо ва имомхатибони масҷидҳои ҷомеъ доир гардид. Дар ин бора ба хабарнигори АМИТ «Ховар» мудири шуъбаи рушди иҷтимоӣ ва робита бо ҷомеаи шаҳри Норак Ҳабиба Сафарова хабар дод.
Тибқи иттилои манбаъ, роҳбарони мақомоти ҳифзи ҳуқуқи шаҳр нуктаҳои асосии Паём, аз ҷумла таъмини се ҳадафи асосии кишвар, масъалаҳои дастгирии ташаббуси ҷавонон ва Соли ҷавонон эълон гардидани соли 2017, баланд бардоштани мақоми зан дар ҷомеа, рушди соҳибкорӣ, таъсиси корхонаҳои саноатӣ, ҷалби сармояи дохиливу хориҷӣ, ҷамъоварии андозҳо, санҷиши фаъолияти субъектҳои хоҷагидорӣ, бунёди иншооти гуногуни хизматрасонӣ, ба кишвари саноатӣ-аграрӣ табдил ёфтани Тоҷикистон, пешгирии амалҳои номатлуб ва мубориза бо падидаҳои номатлуб, аз қабили амалҳои коррупсионӣ, экстремизму терроризм, гардиши ғайриқонунии маводи мухаддирро шарҳ дода, таъкид сохтанд, ки устувор намудани пояҳои давлату давлатдории миллӣ, баланд бардоштани сатҳу сифати зиндагӣ ва ободу зебо гардонидани сарзамини аҷдодӣ, пеш аз ҳама, ба густариши эҳсоси худшиносиву худогоҳӣ ва ифтихори ватандорӣ вобастагии мустақим доранд.