Ҷавонон-ояндаи дурахшони Тоҷикистони соҳибистиқлол

ДУШАНБЕ, 15.02.2017 /АМИТ «Ховар»/. Дар доираи Соли ҷавонон дар муассисаи таълимии №1-и ноҳияи Деваштич маҳфили «Кадбону» зери унвони «Ҷавонон-ояндаи дурахшони Тоҷикистони соҳибистиқлол» бо ташаббуси бахшҳои кор бо занон ва оила, ҷавонон, варзиш ва сайёҳӣ ва дар якҷоягӣ бо шуъбаи маориф ва ташкилоти ҷамъиятии «Созандагони Ватан» баргузор гардид.
Тавре ки аз Кумитаи кор бо занон ва оилаи назди Ҳукумати Ҷумҳурии Тоҷикистон хабар доданд, муовини раиси ноҳия Рафоат Каримова доир ба таълиму тарбияи фарзанд, масъулияти падару модарон, мустаҳкамии оила, ки аз дастуру супоришҳои Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон бармеоянд, сухан ронд.
Гурӯҳи духтарон маҳорати кадбонугию рӯзгордории хешро намоиш доданд, ки аз ҷониби иштирокчиён ба он баҳои баланд дода шуд. Ҳамчунин бонувони собиқадор, муаллимаҳои таълимгоҳҳо қаноатмандии хешро аз ҳунаромӯзию рӯзгордории хонандагон изҳор намуданд. Зеро имрӯз дар таълимгоҳ маҳфилҳои дӯзандагию бофандагӣ, пазандагӣ, расмкашию дуредгарӣ хуб ба роҳ монда шуда, хонандагон дар озмуну намоишҳои гуногун ҷойҳои намунавиро ишғол менамоянд.