Аз 3790 донишҷӯи пурсидашуда 3006 нафар аз ихтисоси интихобкардаашон розӣ ҳастанд

ДУШАНБЕ, 07.02.2017. /АМИТ Ховар/. Дирӯз зимни нишасти матбуотӣ масъулони Маркази миллии тестии назди Президенти Ҷумҳурии Тоҷикистон иттилоъ доданд, ки соли 2016 Маркази мазкур бобати бартараф намудани мушкилоту камбудиҳо ва такмили минбаъдаи низоми ИМД (Имтиҳонҳои марказонидашудаи дохилшавӣ) байни донишҷӯёне, ки аз тариқи ИМД дар соли 2016 ба муассисаҳои таълимӣ дохил шуданд, пурсиш гузаронид. Пурсиши мазкур дар 32 донишгоҳу донишкада ва коллеҷҳои шаҳру ноҳияҳои Душанбе, Қурғонтеппа, Хуҷанд, Хоруғ, Кӯлоб, Панҷакент, Исфара ва Бӯстон, дар байни 3790 донишҷӯ дар доираи 195 ихтисос гузаронида шуд.
«Барои баргузории ин тадбир пурсишномаи иборат аз 16 саволу 6 зерсавол бо забонҳои тоҷикию русӣ таҳия шуда, саволҳои пешниҳодшуда назари донишҷӯёнро оид ба ҷараёни ИМД (Имтиҳонҳои марказонидашудаи дохилшавӣ) дарбар мегирифт. Пурсиш муайян намуд, ки аз шумораи умумии донишҷӯёни иштирокнамуда 3006 нафар (79,31%) аз ихтисоси интихобкардаашон розӣ буда, 6,41%-и пурсидашудагон ихтисосҳоро тасодуфӣ ё бе ихтиёри худ (яъне таҳти андеша ва таъсири дигарон) интихоб кардаанд», -зикр гардид дар нишаст.