Бозиҳои зимистонаи осиёӣ ба анҷом расиданд

ДУШАНБЕ, 27.02.2017/АМИТ «Ховар»/. Бозиҳои VIII зимистонаи осиёӣ, ки аз 19-ум то 26-уми феврал дар шаҳрҳои Саппоро ва Обиҳирои Ҷопон баргузор шуданд, шаби якшанбе ба поён расиданд. Дар ин бозиҳо беш аз 1200 нафар варзишгарон аз 29 кишвар ширкат доштанд. Ба ҳайси меҳмон дар ин бозиҳо варзишгарони Австралия ва Зеландияи Нав иштирок карданд.
Мусобиқот аз рӯи 11 намуди варзиш — биатлон, лижаронии кӯҳӣ, кёрлинг, конкитозӣ, пойгаи лижаронӣ, ҷаҳиш бо лижа аз трамплин, сноуборд, рақси рӯи ях, фристайл, ҳоккей бо шайба ва шорт-трек гузаронида шуданд.
Дар ҳисоби умумидастаӣ варзишгарони Япония бо касби 74 медал (27 тилло, 21 нуқра ва 26 биринҷӣ) ҷойи аввалро ба даст оварданд. Кореяи Ҷанубӣ бо 50 медал (16 тилло, 18 нуқра, 16 биринҷӣ) дар ҷойи дуюм ва Чин бо 35 медал (12 тилло, 14 нуқра, 9 биринҷӣ) дар ҷойи сеюм қарор гирифтанд. Варзишгарони Қазоқистон бо 32 медал (9 тилло, 11 нуқра, 12 биринҷӣ) мақоми чорумро аз худ карданд. Ба варзишгарони 24 кишвари дигари Осиё, аз ҷумла Тоҷикистон муяссар нашуд, ки ба гирифтани медалҳо сазовор гарданд.
Тоҷикистонро дар Бозиҳои VIII зимистонаи осиёӣ чор варзишгар Баракатулло Зокиров, Соҳибназари Турсунмурод, Сайфиддини Низомиддин ва Баҳриддин Ғоибов намояндагӣ карданд. Ҳар чор дар сабқати лижаронии кӯҳӣ дар навъҳои слаломи бузург ва слалом миёни мардон ширкат варзиданд
Бозиҳои IX зимистонаи осиёӣ соли 2021 дар Чин пеш аз Олимпиадаи зимистонаи Пекин-2022 баргузор мешаванд.