Хонандагони шаҳри Қӯрғонтеппа дар олимпиада соҳиби 41 медал гаштанд

ДУШАНБЕ, 11.02.2017. /АМИТ «Ховар»/. Даври сеюми олимпиадаи фаннӣ дар маркази вилояти Хатлон-шаҳри Қӯрғонтеппа ба анҷом расид. Дар он 120 нафар хонандагони муассисаҳои таълимии шаҳри Қӯрғонтеппа қувваозмоӣ намуда, сазовори 41 медал, аз ҷумла 9 медали тилло, 13 медали нуқра, 19 медали биринҷӣ ва 13 ҷойи ифтихорӣ гардиданд. Онҳо дар умум 29% медал ва ҷойҳои ифтихориро ба даст оварданд.

Бино ба иттилои хадамоти матбуоти Раиси вилояти Хатлон,  дар ин ҷода саҳми хонандагони Литсейи №1 бо гирифтани 13 медал ва ҷойи ифтихорӣ, мактаб-интернати физикӣ-математикии «Ориёно» бо гирифтани 5 медал ва 3 ҷойи ифтихорӣ, Мактаби бачагони лаёқатманди шаҳр бо гирифтани 6 медалва 4 ҷойи ифтихорӣ назаррас аст.

Дастовардҳои хонандагони ин мактабҳо бозгӯйи масъулияти баланди омӯзгорони ин муассисаҳои таълимӣ дар таълиму тарбияи шогирдон ва дуруст ба роҳ мондани низоми таълиму тарбия дар муассисаҳои таълимӣ аст.