Парлумони Тоҷикистон Қонун «Дар бораи бехатарии сейсмикӣ»-ро қабул кард

ДУШАНБЕ, 22.02.2017 /АМИТ «Ховар»/. Лоиҳаи Қонуни Ҷумҳурии Тоҷикистон «Дар бораи бехатарии сейсмикӣ» 22 феврал аз ҷониби вакилони палатаи поёнии Парлумони Тоҷикистон баррасӣ ва қабул гардид. Зимни тавзеҳи лоиҳаи қонуни мазкур вакили Маҷлиси намояндагон Баҳром Абдуалимов зикр намуд, ки ҳадафи лоиҳаи Қонуни Ҷумҳурии Тоҷикистон «Дар бораи бехатарии сейсмикӣ» таъмини бехатарии сейсмикии аҳолӣ ва ҳудуди кишвар мебошад.
Қонуни мазкур муносибатҳои ҳуқуқию ташкилиро дар соҳаи баҳодиҳии хатар, сохтмони бино ва иншооти ба зилзила тобовар, огоҳкунии пешакии аҳолиро ба танзим дароварда, коҳиш додани зарари иҷтимоӣ-иқтисодиро аз зилзилаҳои шадиди эҳтимолӣ муайян менамояд.
Қонуни Ҷумҳурии Тоҷикистон «Дар бораи бехатарии сейсмикӣ» аз 7 боб ва 29 модда иборат буда, зимни таҳияи он таҷрибаи кишварҳои хориҷӣ истифода гардидааст.