Имрӯз бозии финалӣ барои Суперҷоми Тоҷикистон баргузор мешавад

ДУШАНБЕ, 04.03.2017/АМИТ «Ховар»/. Имрӯз дар Варзишгоҳи шаҳри Ҳисор чемпиони феълӣ ва соҳиби Ҷоми Тоҷикистон- «Истиқлол»-и Душанбе бо барандаи медалҳои нуқраи чемпионати мамлакат -«Ҳосилот»-и Фархор барои Суперҷоми Тоҷикистон вориди майдон мешаванд. Оғози бозӣ соати 14:00 дар назар аст.
Дирӯз дар толори матбуотии ФФТ нишасти хабарӣ бо мураббиён ва бозингарони дастаҳо гузаронида шуд.
Мӯҳсин Муҳаммадиев, сармураббии дастаи «Истиқлол»-и Душанбе омодагии дастаро ба мавсими нав хуб арзёбӣ кард:
«Омодагиро ба мавсими нав мо аз моҳи декабр шурӯъ кардем. Марҳалаҳои тайёрӣ дар Душанбе ва Туркия гузаронида шуданд. «Истиқлол» дар ин муддат ба ғайр аз футболбозони дастаи мунтахаби Тоҷикистон -Нуриддин Давронов, Ҷаҳонгир Эргашев ва Фарҳод Восиев, боз бо ду легионер-муҳофизатгар Артём Барановский, ки дар клуби футболи «Олимп»-и Украина бозӣ мекард ва бо ҳамлагари рус Дмитрий Барков аз чемпионати Эстония шартномаи худро ба имзо расонид. Фикр мекунам, ки дастаи мо ҳаматарафа ба мавсим омода аст.»
Капитани дастаи «Истиқлол» Фатҳулло Фатҳуллоев чунин иброз дошт:
«Ҳосилот» дастаи хуб аст ва баъди бохташ дар Ҷоми КФО ташнаи ғалаба мебошад. Аз пурқувват кардан ва тағйирот дар ҳайтаи дастаамон хеле шодам. Фикр мекунам, ки бозингарони нав ба дастаи мо кумаки худро хоҳанд расонд».
Сармураббии дастаи «Ҳосилот»-и Фархор Муҳаммадҷон Ҳабибуллоев дар масъалаи тайёрӣ ба ин вохӯрӣ чунин гуфт: «Баъди бохт аз дастаи «Дордой» барои ба худ омадан футболбозонро ба истироҳат фиристодем ва онҳо имрӯз ҷамъ мешаванд. Мутаассифона, чанд нафар бозингарони мо лат бардоштаанд ва дар вохӯрӣ иштирок карда наметавонанд. Ба ин нигоҳ накарда, бо тамоми ҳастӣ барои Суперҷом мубориза мебарем».
Мӯсо Содиқ ҳам ба гуфтаҳои мураббӣ шарик шуда, аз пурқувват будани дастаи «Истиқлол» ҳарф зад: «Истиқлол» дастаи беҳтарини Тоҷикистон мебошад. Бо ин даста бозӣ кардан ифтихор аст. Мо кӯшиш мекунем, ки бозии хуб нишон диҳем».
Бозӣ барои Суперҷоми Тоҷикистон маротибаи 8-ум гузаронида мешавад. Аз ин пеш чунин натиҷаҳо ба даст омадаанд.
2010 «Вахш» (Қӯрғонтеппа) «Истиқлол» (Душанбе) 0:2
2011 «Истиқлол» (Душанбе) «Регар-ТадАЗ» (Турсунзода) 1:0
2012 «Истиқлол» (Душанбе) «Регар-ТадАЗ» (Турсунзода) 2:1
2013 «Равшан» (Кӯлоб) «Регар-ТадАЗ» (Турсунзода) 2:1
2014 «Равшан» (Кӯлоб) «Истиқлол» (Душанбе) 0:5
2015 «Истиқлол» (Душанбе) «Хайр» (Ваҳдат) — 2:2, аз рӯи пеналтӣ 4:3
2016 «Истиқлол» (Душанбе) «Хуҷанд» (Хуҷанд) 3:2.