Оламафрӯзии Наврӯз дар Мисри бостонӣ

ДУШАНБЕ, 21.03.2017. /АМИТ«Ховар»/. 19 март дар яке аз меҳмонхонаҳои пойтахти Миср, ки дар соҳили рӯди Нил ҷойгир аст, ба муносибати ҷашни Наврӯзи хуҷастапай маҳфили идона барпо гардид, ки мизбонии онро Сафорати Тоҷикистон ба дӯш дошт. Дар маҳфили наврӯзӣ роҳбарони Вазорати корҳои хориҷӣ, аъзои парламент ва намояндагони вазорату идораҳои гуногун, аҳли адаб ва фарҳангу ҳунар, рӯзноманигорону соҳибкорони кишвари маҳалли иқомат, инчунин сафирони кишварҳои хориҷӣ ва шаҳрвандони тоҷики муқими Миср ҳузур доштанд.
Сафири Тоҷикистон дар Қоҳира Хусрав Нозирӣ аҳли толорро ба муносибати фаро расидани Наврӯзи оламафрӯз табрик намуда, аз таърихи пайдоиш, моҳият ва арзишҳои волои ҷашни мазкур ёд кард. Дар тӯли баргузории маҳфил барои меҳмонон аз тариқи видео барномаи ҳунарии тоҷикӣ ба намоиш гузошта шуда, бисоти сабзаву суфраи «Ҳафт син», ки толори зиёфатро оро медод, дар маркази таваҷҷуҳи ҳамагон қарор гирифт. Ба меҳмонони ҷашн китобчаи наврӯзӣ, ки аз аксҳову шарҳи рамзҳои наврӯзӣ ва фишурдаи мақолаи донишманди тоҷик Акбар Турсон «Фарҳанги Наврӯз ва идеалҳои СММ » ба забони англисӣ иборат буд, тақдим гардид.
Расонаҳои мисрӣ, аз ҷумла канали моҳворавии «Найл ТВ» роҷеъ ба ҷашни Наврӯз дар Қоҳира, ки мизбони он Сафорати Тоҷикистон буд, мақолаву барномаҳои телевизионӣ таҳия ва мунташир намуданд.
Бузургдошти Наврӯз дар Қоҳира бори дигар пайванди ҳамешагӣ ва ногусастании фарҳанги тоҷикон бо Наврӯзро ба ҷомеаи мисрӣ ва меҳмонони базм таъкид намуд.