Сокинони Кӯлоб бо гумони муомилоти ғайриқонунии сангҳои қиматбаҳо дастгир шуданд

ДУШАНБЕ, 01.03.2017. /АМИТ «Ховар»/. Зимни гузаронидани чорабиниҳои фаврӣ-ҷустуҷӯӣ дар ҳудуди шаҳри Кӯлоб аз ҷониби кормандони милитсия бо гумони муомилоти ғайриқонунии сангҳои қиматбаҳо ду нафар марди 42 ва 47-солаи сокинони шаҳри мазкур дастгир карда шуданд.
Тавре аз Вазорати корҳои дохилӣ хабар доданд, аз гумонбаршудагон ҳангоми ба фурӯш баровардани 42 адад сангҳои қиматбаҳо, аз ҷумла мувофиқи ташхиси иёргарӣ 34 адад санги зумрад, вазнаш 8,66 грамм, 7 адад лаъли асил, вазнаш 16,25 грамм ва як адад ёқути сурх, вазнаш 4,35 грамм бо вазни умумии 30,19 грамм дарёфт гардиданд.
«Муайян карда шуд, ки гумонбаршудагон сангҳои қиматбаҳоро аз марди 52-солаи сокини ноҳияи Муъминобод бо мақсади ба фурӯш баровардан гирифтаанд. Аз рӯи ҳодисаи мазкур парвандаи ҷиноятӣ оғоз гардида, тафтишот идома дорад»,- иттилоъ доданд аз Вазорати корҳои дохилӣ.