Дар Комиссариати ҳарбии вилояти Суғд ҷаласаи корӣ баргузор гардид

ДУШАНБЕ, 01.04.2017 /АМИТ «Ховар»/. Дар Комиссариати ҳарбии вилояти Суғд бо иштироки раисони комиссияҳои даъватии шаҳру ноҳияҳо, комиссарҳои ҳарбӣ ва дигар шахсони масъул ҷаласаи корӣ баргузор шуд.

Тавре аз Хадамоти матбуоти Раиси вилояти Суғд хабар доданд, ҷаласа бо иштироки Рустам Раҳматзода, муовини якуми Раиси вилояти Суғд, раиси комиссияи даъватии вилоятӣ сурат гирифта, дар он асосан ҷараёни  ичрои Фармони Президенти Ҷумҳурии Тоҷикистон «Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1990-1999 Ҷумҳурии Тоҷикистон ба хизмати ҳарбӣ» мавриди назар қарор дода шуд.

Зикр гардид, ки бо таваҷҷуҳи бевоситаи Сарфармондеҳи Олии Қувваҳои Мусаллаҳи Ҷумҳурии Тоҷикистон шароити буду боши хизматичиёни ҳарбӣ дар тамоми қисмҳои низомӣ беҳтар гардида, ин тадбир барои зиёд гардидани сафи ихтиёриён таъсири амиқ расонидааст.

Дар ҷаласа раиси комиссияи даъватии вилоятӣ Рустам Раҳматзода вобаста ба корҳои тарғиботиву ташвиқотӣ барои ҷалби ҷавонон ба сафи Қувваҳои мусаллаҳи кишвар ва дигар паҳлӯҳои фаъолияти комиссариатҳои ҳарбии шаҳру навоҳӣ сухан гуфта, барои ҷоннок намудани фаъолият, бартараф намудани камбудиҳои мавҷуда ва роҳ надодан ба қонуншиканӣ дар мавсими даъвати баҳории ҷавонон супоришҳои мушаххас дод.