«Ҷавонон-ҳомиёни Ватан ва Ваҳдати миллӣ»- ҷамъомад дар шаҳри Панҷакент

ДУШАНБЕ, 04.05.2017 /АМИТ «Ховар»/. Дар арафаи таҷлили 20-солагии Рӯзи Ваҳдати миллӣ ва Рӯзи ҷавонони Тоҷикистон дар шаҳри Панҷакенти вилояти Суғд бо мақсади тарғиби дастовардҳои Ҷумҳурии Тоҷикистон дар тӯли 20 соли Ваҳдати миллӣ ва пешгирии ҷавонон аз шомилшавӣ ба ҳизбу ҳаракатҳои террористӣ дар мавзӯи «Ҷавонон- ҳомиёни Ватан ва Ваҳдати миллӣ» ҷамъомад баргузор гардид.
Тавре аз Кумитаи иҷроияи Ҳизби Халқии Демократии Тоҷикистон (КИ ҲХДТ) дар вилояти Суғд иттилоъ доданд, дар ҷамъомад аз ҷавонон даъват ба амал оварда шуд, ки ба ҳар гуна ҳизбу ҳаракатҳои ифротӣ рӯй наоварда, барои ободию шукуфоии Ватани худ саҳмгузор бошанд.
«Бесабаб нест, ки Пешвои миллат муҳтарам Эмомалӣ Раҳмон соли 2017-ро Соли ҷавонон эълон намуданд, зеро ҷавонон дар ҷаҳони муосир қувваи бузурги пешбаранда ва бунёдгар эътироф шудаанд. Нақши онҳо дар ташаккули ҷомеаи шаҳрвандӣ назаррас аст. Ба андешаи коршиносон, таҷрибаи солҳои охир нишон медиҳад, ки ба дастовардҳои сиёсиву иқтисодӣ ва инкишофи устувори ҷомеа танҳо ҳамон кишварҳое муваффақ гардидаанд, ки ба масъалаи ҷавонон таваҷҷуҳи хосса зоҳир менамоянд ва аз имкониятҳои ақлониву ҷисмонии онҳо самаранок истифода мебаранд»,-зикр шуд дар ҷамъомад.