Дар Душанбе масоили муҳими баҳисобгирии муҳосибӣ, таҳлил ва аудит баррасӣ мегардад

ДУШАНБЕ, 18.05.2017. /АМИТ «Ховар»/. 19-20 май дар шаҳри Душанбе Донишгоҳи давлатии тиҷоратии Тоҷикистон (ДДТТ) ва  Институти ҷамъиятии муҳосибон ва аудиторони касбии Ҷумҳурии Тоҷикистон конференсияи VI байналхалқии илмӣ-амалиро дар мавзӯи «Масоили муҳими баҳисобгирии муҳосибӣ, таҳлил ва аудит» баргузор менамоянд.

Тавре аз ДДТТ ба АМИТ «Ховар» хабар доданд, конференсияи мазкур ду рӯз идома хоҳад кард.

Дар кори  конфронси байналхалқӣ олимону коршиносон аз донишгоҳҳои гуногуни  Қазоқистон, Қирғизистон, Федератсияи Россия ва Ҷумҳурии Тоҷикистон иштирок мекунанд.

Дар конференсия дар мавзӯъҳои «Масъалаҳои ҳолати муосири баҳисобгирии муҳосиботӣ дар Ҷумҳурии Қирғизистон»,  «Усулҳои ташхиси муфлисшавии корхонаҳои тиҷорати хурд», «Фаъолияти аудиторӣ дар Ҷумҳурии Қирғизистон: ҳолат ва дурнамои рушд», «Дороиҳои дарозмӯҳлат: баъзе ҷанбаҳои молиявӣ ва баҳисобгирии андоз» маърӯзаҳо шунида мешаванд.