Дар канори Душанбе 40 тонна сӯзишвории бо роҳи қочоқ ворид гардида ошкор шуд

ДУШАНБЕ, 06.05.2017/АМИТ «Ховар»/. Гумрукчиёни тоҷик дар шоҳроҳи Душанбе-Хуҷанд аз қочоқи 40 тонна сӯзишвории дизелӣ, ки аз Қирғизистон ба Тоҷикистон ғайриқонунӣ ворид гардидааст, ҷилавгирӣ карданд.
Дафтари матбуоти Хадамоти гумруки назди Ҳукумати ҷумҳурӣ иттилоъ медиҳад, ки зимни чорабинии фаврӣ — ҷустуҷӯӣ дар мавзеи Чорбоғ, воқеъ дар канори Душанбе гумрукчиён ду воситаи нақлиёти тамғаи «Шанси», рақами қайди давлатиашон 74 32 ВС 03 ва 89 64 AT 03-ро барои муоинаи гумрукӣ боздошт намуданд. Муайян гардид, ки сӯзишвории дизелиро сокини 33-солаи ноҳияи Ҷаббор Расулов, шаҳрванд Ҳ. А, бо роҳи қочоқ аз Қирғизистон ба Тоҷикистон ворид кардааст. Номбурда бо мақсади рӯйпӯш кардани ҷинояти худ тибқи маслиҳати пешакӣ бо дигарон санади гумрукиро дастрас карда, дар он қайд намудааст, ки гӯё дар дохили нақлиёт 887 ҳазор 500 килограмм гази моеъ ба расмиёти гумрукӣ дароварда шудааст. Арзиши умумии сӯзишвории дизелии бо роҳи қоҷоқ вориднамудаи шаҳрванд Ҳ. А наздик ба 170 ҳазор сомониро ташкил медиҳад.
Доир ба ҳолати мазкур нисбат ба шаҳрванд Ҳ. А. ва дигарон бо моддаи 289 қисми 2 — и Кодекси ҷиноятии Ҷумҳурии Тоҷикистон парвандаи ҷиноӣ боз карда шуда, ба Прокуратураи генералӣ фиристонида шудааст.