Дар Кумитаи рушди маҳал барои ободонии шаҳри Душанбе ситоди махсус таъсис ёфт

ДУШАНБЕ, 04.05.2017 /АМИТ «Ховар»/. Кумитаи рушди маҳали назди Президенти Ҷумҳурии Тоҷикистон ситоди кории махсус ташкил дод, ки роҳбарии онро Қосим Роҳбар, раиси Кумита ба уҳда дошта, ба ҳайати он Фарҳод Қодирзода, муовини раиси ноҳияи Исмоили Сомонӣ, меъмори ваколатдори Сарраёсати меъморӣ ва шаҳрсозии шаҳри Душанбе дар ноҳияи Исмоили Сомонӣ Б.Юсуфов ва аъзои гурӯҳи кории Кумита шомиланд.
Тавре аз Кумитаи рушди маҳали назди Президенти Ҷумҳурии Тоҷикистон хабар доданд, вазифаи ситод аз гузаронидани корҳои ободонӣ ва сабзкорӣ дар гулгашти №5-и хиёбони Рӯдакӣ иборат мебошад, ки шурӯъ аз 24 апрел ҷараён доранд.
Ҳамзамон дар доираи иҷрои корҳои ободонӣ ва сабзазоркунӣ дар ин гулгашт, рангубори чароғҳои поядор, таъмири нурафканҳои баландиашон 10-метра, нишастгоҳҳо, қуттии барқӣ барои чароғҳои равшанкунии сатҳи замин, насб намудани нурафканҳои рангоранг барои ороиши шабонаи гулшанҳо, ҳалли мушкилоти ҷойдошта дар низоми обшоркунии майдонҳо, мувофиқ намудани замин ба меъёрҳои агротехникӣ, гулзорҳо, гулдонҳои калони сангӣ, ҳошияи деворчаҳои зиннатӣ, башаклдарории дарахтон, сабза (газон), таввора кашидани атрофи гулгашт то анҷоми корҳои таъмирӣ босуръат идома доранд.
Масъулини кумита мақсад аз ташкили ситоди мазкурро ободу зебо гардонидани шаҳри Душанбе арзёбӣ намуданд.