Ҷилавгирӣ аз қочоқи бензин дар шоҳроҳи Хуҷанд-Душанбе

ДУШАНБЕ, 19.05.2017 /АМИТ «Ховар»/. 46 ҳазору 100 литр бензини навъи АИ-80, ки аз Қирғизистон ба Тоҷикистон бо роҳи қочоқ интиқол дода шудааст, аз ҷониби гумрукчиён дар шоҳроҳи Хуҷанд- Душанбе ошкор ва мусодира гардид.

Бино ба иттилои Маркази матбуоти Хадамоти гумруки назди Ҳукумати Ҷумҳурии Тоҷикистон, ҳангоми муоинаи гумрукӣ аз воситаи нақлиёти тамғаи «Хубэй», рақами қайди давлатиаш 23 95 ЕА 02, ки онро ронанда, шаҳрванди Ҷумҳурии Тоҷикистон Н.А, идора мекард, ба маблағи  беш аз 221 ҳазор сомонӣ бензини навъи  АИ-80 ошкор гардид.

Маълум гардид, ки моли мазкурро шаҳрванди 31-солаи Ҷумҳурии Тоҷикистон, сокини ноҳияи Бобоҷон Ғафуров А .Д. тариқи қочоқ аз Қирғизистон ворид намудааст.

Нисбат ба шаҳрванд А. Д. бо моддаи 289, қисми 2 — и Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, барои тафтишот ба Прокуратураи вилояти Суғд фиристонида шуд.