Кирдорҳои номатлуби бархе аз ҷавонон боиси иснод овардан ба шаъни худ ва наздикону пайвандон мегардад

ДУШАНБЕ, 04.05.2017. /АМИТ «Ховар»/. Зимни вохӯрӣ дар доираи ҳамкории судманди Вазорати корҳои дохилии Ҷумҳурии Тоҷикистон бо муассисаҳои таълимии кишвар, ки дирӯз дар мактаби таҳсилоти миёнаи умумии №5-и ноҳияи Фирдавсии шаҳри Душанбе бо хонандагон доир гардид, гуфта шуд, ки «дониш чароғи ақл буда, барои инсон мояи манбаи фазлу камол мебошад. Шахси донишманд ва бофазлу хирад дар ҳама давру замон дар майдони набард ба душвориҳо рӯ ба рӯ гардида, пирӯзӣ ба даст меорад. Зеро дониш инсонро бо роҳи росту самарабахш раҳнамун сохта, метавонад ӯро соҳибкору соҳибмаълумот ва соҳибиззат гардонад».
Директори мактаби номбурда Саидалӣ Қурбонов аз иқдоми роҳбарияти Вазорати корҳои дохилӣ дар самти ба роҳ мондани ҳамкории зич бо муассисаҳои таҳсилотӣ изҳори қаноатмандӣ намуда, гуфт: «Саҳми кормандони мақомоти корҳои дохилӣ дар пешгирии ҳуқуқвайронкунӣ ва қонуншиканӣ, тарбия ва ба роҳи дуруст ҳидоят намудани наврасону ҷавонон назаррас буда, чунин иқдом аз сиёсати дурандешона ва хирадмандонаи Роҳбари давлат маншаъ мегирад». Сардори шуъбаи ташкилӣ, таҳлилӣ ва кор бо воҳидҳои вазорат Манучеҳр Икромзода оид ба вазъи ҷинояту ҳуқуқвайронкунӣ дар байни наврасону ҷавонон, оқибатҳои рафтору кирдорҳои номатлуби бархе аз ҷавонон, ки боиси доғ овардан ба номи худ ва наздикону пайвандон мегарданд, масъулияти волидайн ва омӯзгорон дар ин самт ва дигар масъалаҳои мавриди таваҷҷуҳ ибрози назар намуд.