Мулоқоти Пешвои миллат Эмомалӣ Раҳмон бо Сарвазири Ҷумҳурии Халқии Бангладеш хонум Шайх Ҳасина Вазед

Дар ҳошияи Нахустин саммити Сарони давлатҳои арабӣ, исломӣ ва Штатҳои Муттаҳидаи Америка Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Сарвазири Ҷумҳурии Халқии Бангладеш хонум Шайх Ҳасина Вазед мулоқот намуданд.

Дар мулоқот ҳолати кунунии муносибатҳои дуҷониба ва роҳҳои тавсеаи ҳамкориҳои судманди байнидавлатӣ мавриди баррасӣ қарор дода шуд.

Таъкид гардид, ки густариши муносибатҳои дуҷониба бо Бангладеш яке аз самтҳои муҳими сиёсати хориҷии Ҷумҳурии Тоҷикистон барои кишварҳои Осиёи Ҷанубиву Шарқӣ ба ҳисоб меравад.

Сарвари давлат муҳтарам Эмомалӣ Раҳмон изҳор доштанд, ки дар Тоҷикистон тамоми шароит барои фаъолиятҳои иқтисодӣ, тиҷоратӣ, сайёҳӣ ва сармоягузориҳои мустақим фароҳам буда, дар ин замина доираҳои соҳибкорию тиҷоратии Бангладеш метавонанд, ки бо ҳамтоёни тоҷики худ робитаҳои мустақим ва судманд барқарор намоянд.

Таъсиси Шӯрои соҳибкорон, Комиссияи муштараки байниҳукуматӣ оид ба ҳамкориҳои иқтисодӣ, корхонаҳои муштараки бофандагӣ ва дӯзандагӣ, коркарди биринҷ, пӯсти хом ва истеҳсоли пӯсти таёр самтҳои афзалиятноки ҳамкориҳои дуҷониба арзёбӣ шуд.

Хонум Шайх Ҳасина Вазед омодагию ҳавасмании кишварашро барои тақвияти ҳамгироӣ бо Тоҷикистон дар доираи СММ, Созмони ҳамкории Шанхай ва дигар ташкилотҳои байналмилалию минтақавӣ таъкид намуд.

Ҷонибҳо рушди ҳамкорӣ дар соҳаи маорифро низ аз самтҳои ояндадори муносибатҳои байнидавлатӣ арзёбӣ карданд.

Дар идомаи суҳбат масоили тақвияти ҳамбастагии ду давлат дар мубориза ба муқобили терроризму экстремизми байналмилалӣ, гурӯҳои ҷинояткори фаромарзӣ ва ба роҳ мондани ҳамкории мустақими ниҳодҳои амниятӣ мавриди баррасӣ қарор дода шуд.

Сарвари давлат муҳтарам Эмомалӣ Раҳмон аз Хонум Шайх Ҳасина Вазед даъват ба амал оварданд, ки бо сафари расмӣ ба Тоҷикистон ташриф оранд.