Шашмақомро бояд чун осори гаронбаҳои мусиқии миллӣ ҳифз кунем, омӯзем, омӯзонем

ДУШАНБЕ, 12.05.2017 /АМИТ «Ховар»/. Рӯзи Шашмақом дирӯз дар Театри вилоятии мусиқӣ-мазҳакавии ба номи Ато Муҳаммадҷонови шаҳри Қӯрғонтеппа бо иштироки Раиси вилояти Хатлон Давлатшоҳ Гулмаҳмадзода ва алоқомандони ин шоҳасари мусиқӣ таҷлил карда шуд.

Тавре аз Мақомоти иҷроияи ҳокимияти давлатии вилояти Хатлон ба АМИТ «Ховар» хабар доданд, раиси вилояти Хатлон Давлатшоҳ Гулмаҳмадзода зикр намуд: «Осори куҳан ва ёдгориҳои таърихӣ забони гӯёи фарҳанги миллат мебошанд. Мо бояд Шашмақомро чун осори гаронбаҳои мусиқии миллӣ ҳифз кунем, омӯзем, омӯзонем ва барои болоравии сатҳи умумии маърифату эҳсоси худшиносии миллӣ истифода барем».

Ҳамчунин раиси вилоят иброз намуд, ки Шашмақом аслан мусиқии классикии тоҷикон буда, таҷассумгари тафаккури баланди мардуми мо мебошад. «Оҳангҳои Шашмақом на танҳо ба кас кайфияту ҳаловат, осоишу роҳат мебахшанд, балки дари мӯъҷизаи худро барояшон боз намуда, одамонро ба олами ирфонӣ раҳнамун месозанд. Агар ин намуди ҳунарро мӯъҷиза донем, пас, мутрибу эҷодгари онро месазад, ки муъҷизаофар ном барем».

Роҳбари ансамбли «Шашмақом»-и вилояти Хатлон Амриддин Кабиров зикр намуд, ки «имрӯз ба сафи устодони пуртаҷрибаи ин жанри классикӣ ҷавонони зиёди соҳибистеъдод ворид шуда, завқу салиқаи баланд нишон медиҳанд ва бо ин собит менамоянд, ки минбаъд низ ин санъати волои ниёгони шарафманди мо рушду такомул хоҳад ёфт. Моро мебояд чунин ҷавонони ҳунармандро дастгирӣ намуда, ба афзоиши сафи онҳо мусоидат кунем».

Дар охир, ҳунармандони ансамбли «Шашмақом»-и вилоят барномаи ҳунарии  худро пешниҳоди ҳозирин гардониданд.

Зикр кардан ба маврид аст, ки ин санъати мусиқӣ таърихи хеле тӯлонӣ дошта, дар ҳаёти фарҳангию маънавии миллати мо нақши бузург дорад. Давоми садсолаҳо дар замири миллати фарҳангдӯсти тоҷик мақомҳои «Бузрук», «Рост», «Наво», «Дугоҳ», «Сегоҳ» ва «Ироқ», яъне шаш мақом ҷой гирифта, кас бо шунидани садои ҳунармандони хушилҳон ва оҳангҳои дилнавози Шашмақом ба осоиши рӯҳию маънавӣ мерасад.

Дар солҳои соҳибистиқлолии Тоҷикистон Шашмақом чун шоҳкории безаволи савту каломи миллии тоҷик умри дубора ва рушду такомули бесобиқа пайдо кард. Ин мусиқии қадимиву суннатии миллати тоҷик бо ибтикори Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мақоми давлатӣ гирифт. 12 майи соли 2000 аз тарафи Сарвари давлат барои ҳифзу гиромидошти «Шашмақом» Фармон «Дар бораи инкишофи минбаъдаи санъати шашмақомхонӣ дар Ҷумҳурии Тоҷикистон» ба тасвиб расид, ки ҳадафи он эҳё, рушд ва дастрасии кулли мардуми тоҷик ба мероси мусиқии классикии Шашмақом ва тарбияи мардум дар рӯҳияи эҳтиром ба арзишҳои миллӣ унвон мешавад.

Ҳамчунин бо ташаббуси Пешвои миллат шоҳкории мусиқии миллии мо – Шашмақом ба феҳристи ёдгориҳои ҷаҳонии ЮНЕСКО ворид карда шуд.