«Сомон Эйр» дубора соҳиби сертификати IOSA гашт

ДУШАНБЕ, 05.05.2017. /АМИТ «Ховар»/. Ширкати ҳавопаймоии «Сомон Эйр» дубора соҳиби сертификати IOSA-и Ассотсиатсияи байналмилалии нақлиёти ҳавоӣ (International Air Transport Association, IATA) гашт.
Тавре ки аз хадамоти матбуоти ин ширкат хабар доданд, барои ноил шудан ба ин дастовард, ширкати ҳавопаймоии «Сомон Эйр» якҷоя бо нозирон оид ба бехатарии IATA зиёда аз 700 самти бехатариро тафтиш карданд. Соли ҷорӣ IATA стандартҳоро, ки барои тафтиши ширкатҳои ҳавопаймоӣ истифода мебаранд, бо ворид кардани шакли «беҳтаршуда»-и худ нисбатан мушкилтар кард.
«Сомон Эйр» ягона ширкати ҳавопаймоӣ дар миқёси Тоҷикистон мебошад, ки дорои сертификати IOSA гаштааст. Сертификати IOSA бо роҳи гузаронидани аудит, дар ду сол як маротиба нав карда мешавад. Бояд гуфт, ки директори генералии ширкати ҳавопаймоии «Сомон Эйр» Томас В. Ҳаллам II аз Директори генералии IАТА Александр де Юниак даъватномаи махсус барои иштирок дар ҷаласаи умумии солона (AGM) гирифтааст.
Интизор меравад, ки узвияти ширкати ҳавопаймоии «Сомон Эйр» ба IATA зимни ин мулоқот ба тасвиб расад ва ин дастоварди назарраси ширкати ҳавопаймоӣ ва марҳилаи навбатӣ барои эътирофи байналмилалии «Сомон Эйр» хоҳад гашт.
Дар айни ҳол «Сомон Эйр» парвозҳоро аз Тоҷикистон дар самтҳои Олмон, АМА, Туркия, Хитой, Россия ва Қазоқистон муваффақона иҷро мекунад. Пойгоҳи ширкати ҳавопаймоӣ аз ҳавопаймоҳои Боинг 737-300, -800 ва -900 иборат мебошад.