Таҳқиркунандаи гӯри фавтидагон аз ҷониби кормандони милитсия дастгир гардид

ДУШАНБЕ, 03.05.2017. /АМИТ «Ховар»/. Вазорати корҳои дохилии Ҷумҳурии Тоҷикистон аз боздошти як нафар сокини ноҳияи Бохтар, ки дар ҷинояти таҳқири ҷасади фавтидагон ва гӯри онҳо гумонбар мешавад, хабар медиҳад. Гуфта мешавад, ки дар натиҷаи гузаронидани тадбирҳои фаврӣ-ҷустуҷӯӣ аз ҷониби кормандони милитсия сокини ноҳияи Бохтар, марди 22-сола, бо гумони содир намудани ҷинояти таҳқири ҷасади фавтидагон ва гӯри онҳо дастгир гардид.
Номбурда шаби 21 апрели соли равон ба қабристони деҳаи Хурсандии ҷамоати деҳоти Меҳнатободи ноҳияи Бохтар омада, аз 27 адад навиштаҷоте, ки дар сангҳои мармар ва қисман дар тунукаҳо дар болои қабри фавтидагон барои ёдбуд гузошта шуда буданд, 14 ададро шикаста, 13 адад нишонаро қисман корношоям кардааст.
Ба иттилои манбаъ, аз рӯи ин ҳодиса парвандаи ҷиноятӣ оғоз гардида, корҳои тафтишотӣ идома доранд.