Дар Душанбе маҷаллаи «Шарҳи вазъи вобаста ба маводи нашъадор дар Ҷумҳурии Тоҷикистон дар соли 2016» муаррифӣ гардид

ДУШАНБЕ, 30.06.2017 /АМИТ «Ховар»/. Бо ташаббуси Агентии назорати маводи нашъаовари назди Президенти ҶТ дар Душанбе муаррифии маҷаллаи «Шарҳи вазъи вобаста ба маводи нашъадор дар Ҷумҳурии Тоҷикистон дар соли 2016» баргузор гардид.

Директори Агентӣ Шерхон Салимзода ба кишварҳои маблағгузор барои ҳамкорӣ миннатдорӣ намуда, зикр кард, ки маҷаллаи «Шарҳи вазъи вобаста ба маводи нашъадор дар Ҷумҳурии Тоҷикистон дар соли 2016» моҳи марти соли ҷорӣ дар чорчӯбаи кори иҷлосияи навбатии Комиссия оид ба воситаҳои нашъадор дар шаҳри Вена ба иштирокчиён тақсим карда шуд.

Дар маросими муаррифии маҷалла диққати асосӣ ба мавзӯъҳои тамоюлҳои асосии инкишофи вазъи мухаддиротӣ дар кишвар ва минтақа, тадбирҳои андешидаи Ҳукумати Ҷумҳурии Тоҷикистон, вазорату кумитаҳо, ҳамчунин созмонҳои байналмилалӣ ва ҷамъиятӣ дар самти назорати муомилоти маводи нашъаовар ва пешгирии нашъамандӣ, мубориза бо муомилоти ғайриқонунии маводи нашъадор дар Ҷумҳурии Тоҷикистон, истеҳсоли ғайриқонунии маводи нашъадор дар Афғонистон, мубориза бо қочоқи маводи мухаддир, гурӯҳҳои муташаккили ҷинояткор, мустаҳкам намудани сарҳади давлатӣ, гузаронидани амалиёти муштараки зиддимухаддиротӣ бо мақомоти ҳифзи ҳуқуқи кишварҳои минтақа, ҳамкории байналмилалӣ, амалисозии барномаҳо ва татбиқи лоиҳаҳои зиддимухаддиротӣ дар Ҷумҳурии Тоҷикистон равона карда шуданд.

Таъкид гардид, ки таҳлили ҷиноятҳои вобаста ба маводи нашъаовар дар Тоҷикистон дар соли 2016 гузаронида шуда, вазифаҳои асосӣ барои соли 2017 дар соҳаи муқовимат ба муомилоти ғайриқонунии маводи нашъаовар ва пешгирии нашъамандӣ дар Тоҷикистон муайян гардиданд.

Дар рафти муаррифии маҷалла намояндаи минтақавии Раёсати СММ оид ба маводи нашъаовар ва ҷинояткорӣ дар Осиёи Марказӣ Ашитта Миттал баромад намуда, масъалаи таҳияи барномаҳо ва лоиҳаҳои зиддимухаддиротии СММ оид ба маводи нашъаовар ва ҷинояткориро дар Тоҷикистон ва татбиқи онро хуб арзёбӣ намуд.