Дастаи мунтахаби Тоҷикистон барои роҳхат ба Чемпионати Осиё-2018 мубориза мебарад

ДУШАНБЕ, 9.06.2017 /АМИТ «Ховар»/. 6 июл  қуръакашии бозиҳои марҳилаи интихобии Чемпионати Осиё -2018 оид ба футзал дар қароргоҳи Конфедератсияи футболи Осиё, воқеъ дар шаҳри Куала-Лумпури Малайзия  баргузор мегардад. Дар ин бора АМИТ «Ховар» иттилоъ медиҳад.

Бояд зикр кард, ки дар  маросими қуръакашӣ дастаи мунтахаби футзали Тоҷикистон рақибони худро  пайдо хоҳад кард. Бозиҳои интихобии Чемпионати Осиё-2018 аз 13 то 22 октябри соли равон баргузор мешаванд. Дирӯз Конфедератсияи футболи Осиё тартиби баргузории маросими қуръакаширо муайян намуд. Имсол маросими мазкур ба таври дигар сурат мегирад.

Тибқи муқаррароти низомнома дастаҳои мунтахаби футзал вобаста ба минтақаҳои худ тақсим  карда мешаванд. Минтақаҳои марказӣ ва ҷанубии Осиё дар як сабад ҷой дода мешаванд, зеро Непал ягона дастае хоҳад буд, ки қисмати ҷанубии қораро намояндагӣ мекунад. Дар маҷмӯъ дар бозиҳои интихобии Чемпионати ҷаҳон -2018 оид ба футзал 30  дастаи миллӣ барои дарёфти мақоми ифтихорӣ талош ба харҷ медиҳанд.

Ёдовар мешавем, ки дастаҳои  мунтахаби футзали кишварҳои Тоҷикистон, Афғонистон, Эрон, Қирғизистон, Непал, Туркманистон ва Ӯзбекистон барои чор роҳхат дар ин бозиҳои интихобӣ мубориза мебаранд.