«ХАЙР, БОҒЧА! САЛОМ, МАКТАБ!»: намоишгоҳи кушод барои наврасон дар Хатлон
![](https://khovar.tj/wp-content/uploads/2017/06/hajr-bogcha-salom-maktab.jpg)
ДУШАНБЕ, 12.06.2017 /АМИТ «Ховар»/. Муассисаи давлатии Китобхонаи оммавии вилояти Хатлон ба номи Шамсиддин Шоҳин бо фаро расидани таътили тобистона дар толори Китобхонаи бачагонаи вилоятӣ таҳти унвони «Хайр, боғча! Салом, мактаб!» намоишгоҳи кушоди иборат аз бозичаю лухтакҳо ва китобҳои тозанашри бачагона, махсусан барои синфҳои ибтидоиро ташкил намуда, ба маърази тамошо гузоштааст. Дар ин бора аз Мақомоти иҷроияи ҳокимияти давлатии вилояти Хатлон хабар доданд.
Тавре манбаъ иттилоъ медиҳад, ҳадафи асосии ин намоишгоҳ асосан тарғиби ҳамаҷонибаи адабиёти таълимӣ дар байни кӯдакону наврасон, такомули қобилияти зеҳнии онҳо, ташаккули шахсияти бунёдкор, тарбияи ҳисси хештаншиносӣ ва ватандӯстӣ мебошад.
Зикр карда шуд, ки падару модарон, муррабияҳову омӯзгорон имконият доранд, ки минбаъд наврасон ва кӯдакони худро барои ба китобхона омадану аъзо шудан омода сохта, ҳамчунин ба онҳо истифодабарӣ аз хазинаи китобҳои бачагонаро омӯзонанд. Ҳамзамон ҳамаррӯза аз ҷониби китобдорон ҷиҳати таътили тобистонаи мактаббачагон дар толорҳои хониши бачагона чорабиниҳои шавқовару омӯзишӣ баргузор карда мешавад.