Иҷлосияи навбатии Маҷлиси миллии Маҷлиси Олии Ҷумҳурии Тоҷикистон 12 июл баргузор мешавад

ДУШАНБЕ, 24.06.2017 /АМИТ «Ховар»/.  12 июли соли 2017 дар шаҳри Душанбе  иҷлосияи ёздаҳуми Маҷлиси миллии  Маҷлиси Олии Ҷумҳурии Тоҷикистон  даъвати панҷум баргузор мегардад.

Аз палатаи болоии Парлумони  мамлакат ба АМИТ «Ховар» иттилоъ  доданд, ки дар иҷлосия аъзои Маҷлиси миллӣ  Қонунҳои  конститутсионии Ҷумҳурии Тоҷикистон «Оид ба ворид намудани тағйиру иловаҳо ба Қонуни конститутсионии Ҷумҳурии Тоҷикистон «Дар бораи интихоботи  Маҷлиси Олии Ҷумҳурии Тоҷикистон», «Дар бораи Ҳукумати Ҷумҳурии Тоҷикистон», инчунин Қонунҳои Ҷумҳурии Тоҷикистон «Дар бораи сайёҳии дохилӣ», «Дар бораи арзёбии  таъсиррасонӣ ба муҳити зист», «Дар бораи  ворид намудани тағйиру иловаҳо ба Кодекси  иҷрои ҷазои  ҷиноятии Ҷумҳурии Тоҷикистон» -ро баррасӣ ва ҷонибдорӣ менамоянд.

Ҳамзамон интизор меравад, ки дар ҷараёни иҷлосияи ёздаҳуми Маҷлиси миллӣ  масъалаҳои марбут ба иваз намудани номи баъзе  аз маҳалҳои аҳолнишини кишвар баррасӣ гардад.