Вакилони парлумонҳои кишварҳои аъзои ИДМ тарҳи таҳрири нави қонуни намунавии «Дар бораи мақоми ваколатдори ҳуқуқи инсон»-ро тасдиқ намуданд

ДУШАНБЕ, 11.04.2026 /АМИТ «Ховар»/. Дар шаҳри Санкт-Петербург ҷаласаи Комиссияи доимии Ассамблеяи байнипарлумонии кишварҳои Иттиҳоди Давлатҳои Мустақил оид ба сиёсати иҷтимоӣ ва ҳуқуқи инсон баргузор гардид.

Дар кори ҷаласа аъзои Маҷлиси миллии Маҷлиси Олии Ҷумҳурии Тоҷикистон, раиси Кумитаи Маҷлиси миллӣ оид ба масъалаҳои иҷтимоӣ, ҳифзи саломатӣ, маориф, фарҳанг, сиёсати ҷавонон ва занон Мунира Каримзода, вакили Маҷлиси намояндагони Маҷлиси Олии Ҷумҳурии Тоҷикистон, раиси Кумита оид ба масъалаҳои иҷтимоӣ, оила ва ҳифзи саломатӣ Муҷибахон Ҷавҳарӣ ва намояндаи ваколатдори Маҷлиси Олии Ҷумҳурии Тоҷикистон дар Ассамблеяи байнипарлумонии кишварҳои ИДМ Абдухалил Ғафурзода иштирок намуданд.

Иштирокчиён тарҳи таҳрири нави қонуни намунавии «Дар бораи мақоми ваколатдори ҳуқуқи инсон»-ро баррасӣ ва тасдиқ намуданд.

Дар санад мақоми ҳуқуқии омбудсменҳо дақиқ гардида, ваколатҳои онҳо васеъ карда шуда, инчунин кафолатҳои иловагии истиқлолият муқаррар гардидаанд.

Ҳамчунин, дар он механизмҳои соддасозии дастрасии шаҳрвандон ба ҳифзи ҳуқуқҳо пешбинӣ шудаанд, аз ҷумла шаклҳои фосилавии муроҷиат ва машварат, инчунин тадбирҳои вокуниши фаврӣ ба вайроншавии низомии ҳуқуқу озодиҳо.

Илова бар ин, иштирокчиён дар маҷмӯъ тарҳи таҳрири нави Консепсияи фазои умумии муҳоҷирати кишварҳои ИДМ-ро низ тасдиқ намуданд. Таҳрири нав манфиатҳои ҳамаи кишварҳои минтақаро ба назар гирифта, ба фароҳам овардани шароите равона шудааст, ки дар он ҳамкорӣ дар соҳаи муҳоҷират ба рушди иҷтимоию иқтисодӣ, таъмини амният, муқовимати самаранок ба муҳоҷирати ғайриқонунӣ ва баланд бардоштани сатҳи зиндагии аҳолӣ мусоидат менамояд.

Ҳамчунин, парлумонҳо тарҳи тавсияҳоро «Дар бораи равишҳои ҳамоҳангшудаи консептуалӣ ба ташкили меъёргузории меҳнат дар давлатҳои иштирокчии ИДМ бо дарназардошти ҷорӣ намудани технологияҳои рақамӣ» тасдиқ намуданд.

Ғайр аз ин, иштирокчиён тарҳҳои қонунҳои намунавии «Дар бораи донории хун ва ҷузъҳои он», инчунин тарҳи тавсияҳоро «Самтҳои асосии сиёсати иҷтимоӣ нисбат ба кормандони синни калонсол дар давлатҳои иштирокчии ИДМ» баррасӣ намуданд. Ин ҳуҷҷатҳо барои дарёфти эроду пешниҳодҳо ба парлумонҳои кишварҳои Иттиҳод ирсол карда мешаванд.

Иштирокчиён ҳамчунин мувофиқи мақсад донистанд, ки дар доираи Соли ҳифзи саломатӣ дар ИДМ моҳи апрели соли 2026 ҷаласаи махсуси коршиносӣ таҳти унвони «Қонуни намунавӣ «Дар бораи таъмини доруворӣ дар давлатҳои иштирокчии ИДМ: аз қабул то татбиқ» баргузор гардад.

АКС: Ассамблеяи байнипарлумонии кишварҳои ИДМ