Конференсияи байналмилалӣ дар бораи нақши Пешвои миллат дар таҳкими Ваҳдати миллӣ ба кори худ оғоз кард

ДУШАНБЕ, 15.06.2017 /АМИТ «Ховар»/. Имрӯз дар Донишгоҳи миллии Тоҷикистон бахшида ба 20-солагии Ваҳдати миллӣ конференсияи байналмилалии илмӣ-назариявӣ дар мавзӯи «Нақши Президенти Ҷумҳурии Тоҷикистон, Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон дар таҳкими Ваҳдати миллӣ» ба кори худ оғоз кард.

Хабарнигори АМИТ «Ховар» иттилоъ медиҳад, ки дар оғози кори конференсия ректори Донишгоҳ Муҳаммадюсуф Имомзода ҳозиринро хайрамақдам гуфта, Ваҳдати миллиро бо сарварии Президенти Ҷумҳурии Тоҷикистон муҳтарам Эмомалӣ Раҳмон яке аз арзишмандтарин ва нодиртарин дастоварди миллати тоҷик унвон кард.

Дар назар аст, ки конференсия ду рӯз идома ёфта, дар кори он олимони маъруфи ватаниву хориҷӣ, вакилони мардумӣ, муҳаққиқон, судяҳо, прокуророн, мутахассисони варзидаи мақомоти ҳифзи ҳуқуқи кишвар, намояндагони муассисаҳои олии касбӣ ва ниҳодҳои ҷомеаи шаҳрвандӣ иштирок намоянд.  Дар баробари донишмандони ватанӣ, ҳамзамон мудири кафедраи ҳуқуқи конститутсионии факултети ҳуқуқшиносии Донишгоҳи давлатии Москва ба номи М.В.Ломоносов, доктори илмҳои ҳуқуқшиносӣ, профессор Авакян Сурен низ иштирок ва маърӯза хоҳад кард.