Мактаби сулҳпарваронаи Пешвои миллат-роҳнамои ҷавонон барои имрӯзу ояндаи дурахшон

ДУШАНБЕ, 24.06.2017 /АМИТ «Ховар»/. «Мактаби сулҳпарваронаи Пешвои миллат — роҳнамои ҷавонон барои имрӯзу ояндаи дурахшон» — таҳти чунин унвон дирӯз дар Академияи таҳсилоти Тоҷикистон бахшида ба 20-солагии Рӯзи Ваҳдати миллӣ ва Соли ҷавонон конференсияи илмию амалии ҷумҳуриявӣ баргузор шуд.

Тавре аз Академияи таҳсилоти Тоҷикистон хабар доданд, президенти Академияи таҳсилоти Тоҷикистон  Ғуломқодир Бобизода зимни муаррифии натиҷаҳои сиёсати ваҳдатгароёна иброз намуд: «Пешвои миллат ҳанӯз дар Иҷлосияи шонздаҳуми тақдирсоз гуфта буданд, ки «ман ба шумо сулҳ меоварам ва барои расидан ба ин мақсад ҷонамро дареғ намедорам». Маҳз ҳамин суханон дар дили шаҳрвандони мамлакат шӯълаи умедро ба ояндаи нек равшан кард.

Ба андешаи Ғуломқодир Бобизода, Ваҳдати миллӣ, ки имрӯз дар саросари кишвар ҳукмфармост, барои инсонҳо якдилӣ, барои давлат якпорчагӣ, барои рушди он иттифоқи тамоми шаҳрвандон сарфи назар аз миллату дину мазҳаб тарҳрезии иқтисоди ягонаи барои ҳамаи қишрҳои ҷомеа манфиатбахшро таъмин намудааст.

Инчунин дар конференсия  дар мавзӯъҳои «Президент – кафили сулҳу Ваҳдати миллӣ», «Сиёсати хирадмандонаи Пешвои миллат – мактаби тафаккури навини миллӣ», «Роҳҳои баланд бардоштани тарбияи ҳуқуқии хонандагон», «Арзишҳои тарбиявии асарҳои Пешвои миллат» ва «Таҳсилоти кӯдакони дорои эҳтиёҷоти махсуси таҳсилотӣ дар шароити муассисаҳои таҳсилоти миёнаи умумӣ» маърӯзаҳо шунида шуд.

Зикр шуд, ки Ваҳдати миллӣ бо таъмини осудаҳолии шаҳрвандони кишвар бузургтарин дастоварди миллии тоҷикон маҳсуб мешавад. Самимият, ҷасорат, майли бозоварии гурезагони тоҷики хориҷ аз мамлакат, дипломатияи олӣ ва дигар сифатҳои шахсии Президенти Ҷумҳурии Тоҷикистон имкон ба вуҷуд оварданд, ки он рӯзҳои мудҳиш анҷом ёфта, Ваҳдати миллӣ тантана намояд.

Имрӯз дар дохили Тоҷикистон ва берун аз он ҷомеашиносон сулҳи тоҷиконро омӯхта, онро ба ҳайси дастоварди таърихӣ дар кишварҳои худ барои татбиқ тавсия медиҳанд.