Дастовардҳои хонандагони тоҷик дар олимпиадаҳои ҷаҳонӣ

ДУШАНБЕ, 24.07.2017 /АМИТ «Ховар»/. Аз 12 то 23 июли соли 2017 дар шаҳри Рио де Жанейрои Ҷумҳурии Бразилия  Олимпиадаи ҷаҳонӣ «58^th IMO 2017» аз фанни математика баргузор шуд, ки Ҷумҳурии Тоҷикистонро 6 нафар хонандагон муаррифӣ намуданд.

Тавре аз Вазорати маориф ва илми Ҷумҳурии Тоҷикистон хабар доданд, дар Олипиада аз 100 давлати дунё хонандагон иштирок карда, мактаббачаҳои тоҷик тавонистанд бо гирифтани 3 медали биринҷӣ ва се ифтихорномаи фахрӣ Парчами Тоҷикистонро дар арсаи ҷаҳон баланд бардоранд.

Муҳаммадҷон Бобоев аз Муассисаи давлатии таълимии «Литсей барои хонандагони болаёқат» дар шаҳри Душанбе, Наимҷон Хонҷонов ва Комрон Абдуллоев аз Муассисаи таълимии хусусии Литсей-интернати Тоҷикистону Россия «Ҳотам ПВ» сазовори медали биринҷӣ гардиданд.

Инчунин аз 16 то 24 июли соли равон дар шаҳри Ёгякартаи Ҷумҳурии Индонезия Олимпиадаи ҷаҳонӣ «48^th IPhO-2017» аз фанни физика доир шуд, ки Ҷумҳурии Тоҷикистонро 5 нафар хонандагон муаррифӣ намуданд. Дар он аз 87 давлати дунё хонандагон иштирок намуданд.

Дар ҷамъбаст хонандагони тоҷик бо сазовор гардидани 2 медали биринҷӣ ва 1 ифтихорномаи фахрӣ дастёб гардиданд.

Сабина Абдураҳмонова аз Муассисаи давлатии таълимии «Литсей барои хонандагони болаёқат» дар шаҳри Душанбе ва Далер Пиров аз Муассисаи таълимии хусусии Литсей-интернати Тоҷикистону Россия «Ҳотам ПВ» сазовори медали биринҷӣ гардиданд.

Бояд зикр намуд, ки аз аввали соли 2017 хонандагони тоҷик ба Ватан 99 медал (14 медали тилло, 35 медали нуқра, 50 медали биринҷӣ) оварданд.