Мизи мудаввар оид ба муколамаи давлат ва бахши хусусӣ дар соҳаи сайёҳӣ

Июль 14, 2017 17:21

ДУШАНБЕ, 14.07.2017. /АМИТ «Ховар»/.  Имрӯз бо ташаббуси Кумитаи рушди сайёҳии назди Ҳукумати Ҷумҳурии Тоҷикистон дар шаҳри Душанбе мизи мудаввар «Оид ба муколамаи давлат ва бахши хусусӣ дар соҳаи сайёҳӣ» баргузор шуд.

Тавре аз Кумитаи рушди сайёҳии назди Ҳукумати Ҷумҳурии Тоҷикистон хабар доданд, ҳадаф аз ҷамъомад муайян намудани монеаву проблемаҳои соҳа, бартараф намудани камбудиҳо, истифодаи сайёҳӣ ҳамчун яке аз самтҳои асосии соҳибкорӣ, омода кардани мутахассисони ҷавобгӯи талабот дар соҳа, инчунин ҷалби сармоя ба инфрасохтори соҳаи сайёҳӣ ва дигар масъалаҳои мубрами соҳа иборат буд. Дар ҷамъомади мазкур тамоми ширкатҳои сайёҳии ҷумҳурӣ иштирок намуданд.

Раиси Кумитаи рушди сайёҳии назди Ҳукумати Ҷумҳурии Тоҷикистон Нуъмон Абдуғаффорзода сухан ронда, зикр намуд, ки маҳз бо талошҳои созанда ва собитқадамонаи Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар заминаи сиёсати хирадмандонаи «дарҳои кушод» Ҷумҳурии Тоҷикистон аз соли 2007 ба  узвияти комилҳуқуқи Созмони умумиҷаҳонии сайёҳӣ пазируфта шуда, барои ворид гаштани соҳаи сайёҳии кишвар ба бозори ҷаҳонии сайёҳӣ заминаҳои воқеӣ фароҳам омад.

Бо ташаббуси навбатии Пешвои миллат Кумитаи рушди сайёҳии назди Ҳукумати Ҷумҳурии Тоҷикистон таъсис дода шуд. Мақсади асосии ташкили сохтори нав тавсеа бахшидани соҳаи сайёҳӣ, истифодаи самараноки имкониятҳои мавҷуда дар ин самт, инкишофи инфрасохтори сайёҳӣ, беҳтар кардани сифати хизматрасонӣ, густариши раванди танзими давлатӣ ва дастгирии сайёҳии дохиливу хориҷӣ, ҷалби ҳарчи бештари сармоя дар ин самт ва омода кардани кадрҳои болаёқат арзёбӣ мегардад.

Дар заминаи Паёми навбатии Президенти Ҷумҳурии Тоҷикистон ба Маҷлиси Олӣ ҷиҳати босуръат тараққӣ додани соҳаи сайёҳӣ дар кишвар воридоти таҷҳизоту маводи сохтмонии иншооти сайёҳӣ аз пардохтҳои андозию гумрукӣ, инчунин, ширкатҳои сайёҳӣ дар панҷ соли аввали фаъолияташон аз пардохти андоз аз фоида озод карда шуданд.

Бояд зикр намуд, ки мақсади асосии сиёсати давлатӣ дар соҳаи сайёҳӣ ин таъмин намудани шароитҳои мусоиди ҳукуқӣ барои ташкили фаъолияти самарабахши субъектҳои фаъолияти туристӣ ва дар ин замина таьсиси бозори самаранок ва рақобатпазири сайёҳӣ дар Ҷумҳурии Тоҷикистон мебошад, ки имконотро барои қонеъгардонии талаботи шаҳрвандони дохилӣ ва хориҷӣ ба хизматрасониҳои мухталиф ва сифатноки соҳа таъмин намояд.

Дар ҷамъомад ҳадафҳои Кумитаи навтаъсис ва вазифаҳои нави   ширкатҳои сайёҳӣ муаррифӣ карда шуданд.

Июль 14, 2017 17:21

Хабарҳои дигари ин бахш

Сарвари давлат Эмомалӣ Раҳмон дар ноҳияи Дарвоз аз деҳаи этнографии комплекси сайёҳии «ЗЕВ.С» дидан намуданд
Пешвои миллат Эмомалӣ Раҳмон дар ноҳияи Дарвоз ба фаъолияти комплекси сайёҳии «ЗЕВ.С» оғоз бахшиданд
РУШДИ САЙЁҲӢ. Имсол 1612 нафар сайёҳон табиати нотакрори Бадахшонро тамошо карданд
«ХАТЛОН-ҚАЛБИ ГАРМИ САЙЁҲӢ». Дар шаҳри Кӯлоб форум ва намоишгоҳи байналмилалии сайёҳӣ доир гардид
«САЁҲАТ БА ҚАЛБИ АВРУОСИЁ». 12 июл иштирокчиёни экспедитсияи байналмилалӣ ба Тоҷикистон мерасанд
«ХАТЛОН-ҚАЛБИ ГАРМИ САЙЁҲӢ». Дар Кӯлоб форум ва намоишгоҳи байналмилалии сайёҳӣ доир мешавад
Дар мавзуи «Нақши Ваҳдати миллӣ дар рушди иқтисоди миллӣ ва сайёҳию соҳибкорӣ» ҳамоиш баргузор шуд
Экспедитсияи сайёҳии «Саёҳат ба қалби Авруосиё-2025» аз Москва оғоз гардид
Тоҷикистону Ҳиндустон ҳамкории фарҳангӣ ва сайёҳиро таҳким мебахшанд
РУШДИ САЙЁҲӢ ДАР БАДАХШОН. Сабзазорҳои алпӣ, биёбонҳои баландкӯҳ, дарёҳои тезҷараён ва кӯлҳои мусаффои он назаррабо мебошанд
Ҳайати Тоҷикистон дар ҷаласаи 71-уми ҷаласаи Комиссияи Аврупоии Созмони умумиҷаҳонии сайёҳӣ иштирок намуд
Мавзеи сайёҳии «Арху» ба макони писандидаи сайёҳон табдил ёфтааст